Пасля выкрадання каштоўнасцей з Луўра, яго скарбы схавалі ў падземным сховішчы Банка Францыі

На такія беспрэцэдэнтныя меры бяспекі кіраўніцтва музея пайшло пасля дзёрзкага грабяжу, калі злачынцы за некалькі хвілін вынеслі з Луўра каштоўнасці на суму каля 88 мільёнаў еўра. Цяпер частка каштоўнасцей музея захоўваецца побач з залатым запасам краіны.

Скрадзеная дыядэма імператрыцы Яўгеніі (уверсе) і як карона (унізе), якая была кінутая грабежнікамі і пасля знойдзена на вуліцы. Фота: Wikimedia Commons

Як паведамляюць RTL і BFMTV, частку калекцыі — у тым ліку каралеўскія ўпрыгажэнні з Галерэі Апалона — пад узмоцненай аховай паліцыі перавезлі ў сховішчы Банка Францыі, размешчаныя на глыбіні 26 метраў. Менавіта там захоўваецца каля 90 % залатога запасу краіны, піша выданне Bild.

Крыніцы адзначаюць, што такі перанос — беспрэцэдэнтная мера бяспекі. У тым жа сховішчы ўжо знаходзяцца і знакамітыя запісныя кнігі Леанарда да Вінчы, ацэненыя больш чым у 600 мільёнаў еўра. Якая менавіта частка ювелірнай калекцыі была перамешчана, у музеі не ўдакладняюць.

Рабаванне адбылося раніцай 20 кастрычніка каля 9:30. Паводле звестак Libération, чацвёра ўзброеных і замаскіраваных грабежнікаў праніклі ў музей праз шкляныя дзверы, што трапілі ў «мёртвую зону» сістэмы відэаназірання. Усяго за некалькі хвілін яны, скарыстаўшыся пад’ёмнікам, шкларэзамі і бензапіламі, узламалі вітрыны і ўцяклі на матаролерах.

Скандал выклікаў вострыя пытанні да сістэмы бяспекі Луўра: на знешнім перыметры даўжынёй 1,3 кіламетра дзейнічала ўсяго пяць камер, прычым частка з іх не працавала. Пакуль што злачынцы застаюцца на волі, а французская паліцыя прыцягнула да расследавання спецыялістаў з Ізраіля і правярае магчымую датычнасць аднаго з супрацоўнікаў музея.

Каментары да артыкула