Уначы была паралізавана праца аэрапорта Вільні
Аэрапорт сталіцы Вільні зноў быў закрыты з-за метэазондаў з Беларусі. Некалькі рэйсаў перанакіравалі ў бліжэйшыя аэрапорты.
Архіўнае фота
Аэрапорт прыпыніў сваю працу 21 кастрычніка ў 22:23, паведамляе «Волна».
Прычынай стала тое, што ў небе над Вільняй былі заўважаныя кантрабандныя метэазонды з Беларусі.
Рэйсы з Лісабона, Антальі, Трэвіза, Барселоны перанакіравалі ў Коўна, з Франкфурта і Берліна — у Рыгу, з Лондана — у Варшаву, з Капенгагена — у Палангу. Самалёт са Стакгольма вярнуўся ў аэрапорт адпраўлення. Рэйс з Вільні ў Осла адправіцца пасля адкрыцця паветранай прасторы.
Мінулы раз паветраную прастору ў раёне аэрапорта Вільні зачынялі ўначы з 4 на 5 кастрычніка. Тады ў небе над аэрапортам з’явіліся метэазонды. 14 рэйсаў былі адмененыя, а 16 — затрыманыя.
Аэрапорт адкрыўся раніцай у 06:40 у сераду.