Каля амерыканскага ўзбярэжжа знайшлі скарб з разбітага карабля XVIII стагоддзя
Паблізу ўзбярэжжа амерыканскага штата Фларыда дайверы знайшлі частку страчаных іспанскіх скарбаў — больш за тысячу срэбных і залатых манет. Іх прыкладны кошт ацэньваецца ў мільён долараў, паведамляе CNN.
Фота: Queens Jewels LLC
Як мяркуецца, гэтыя манеты належалі да грузу іспанскай флатыліі, якая пацярпела крушэнне падчас урагану 31 ліпеня 1715 года. Тады караблі, што вярталіся з калоній у Іспанію, перавозілі золата, срэбра і каштоўнасці.
Манеты, знойдзеныя цяпер, былі адчаканеныя ў іспанскіх калоніях у Балівіі, Мексіцы і Перу. На іх захаваліся даты і адзнакі манетных двароў, што мае вялікае значэнне для гісторыкаў і калекцыянераў.
Сал Гутуза, дырэктар кампаніі Queens Jewels LLC, супрацоўнікі якой знайшлі скарб, адзначыў:
«Кожная манета — гэта частка гісторыі, адчувальная сувязь паміж людзьмі, якія жылі, працавалі і плавалі па моры ў залаты век Іспаніі. Знайсці тысячу з іх за адзін раз — рэдкая і незвычайная з'ява».
Улады Фларыды забяруць 20% знаходкі для захоўвання, астатняе будзе падзелена паміж кампаніяй і яе падрадчыкамі.
Цікава, што гэта не першая такая знаходка: раней у гэтым рэгіёне ўжо знаходзілі залатыя і срэбныя манеты з таго ж самага крушэння.
Чытайце таксама:
Археолагі расказалі, ці ўдалося адшукаць на дне Бярэзіны скарб Напалеона
У ізраільскай пустыні знайшлі загадкавую піраміду, поўную скарбаў