Кібератака паралізавала працу аэрапортаў па ўсёй Еўропе
Напярэдадні вечарам кібератака на знешняга сэрвіс-правайдэра выклікала сур’ёзныя збоі ў працы аэрапортаў па ўсёй Еўропе. У Берліне з меркаванняў бяспекі цалкам адключылі доступ да сістэм, што прывяло да доўгіх чэргаў, затрымак і адмены рэйсаў, паведамляе адміністрацыя аэрапорта, піша Bild.
Аэрапорт Берлін-Брандэнбург. Фота: Soeren Stache/picture alliance via Getty Images
Хаця сам берлінскі аэрапорт не стаў прамой мэтай атакі, пасажыры адчулі наступствы: рэгістрацыя і пасадка адбываліся ўручную, а чаканне зацягнулася на гадзіны. Падобная сітуацыя склалася і ў Бруселі, дзе ўлады папярэдзілі пра «значныя збоі» і параілі пасажырам прыязджаць загадзя.
Лонданскі аэрапорт Хітроу таксама паведаміў пра праблемы, назваўшы іх «тэхнічным збоям». Тым часам сэрвіс-правайдэр, чые сістэмы выкарыстоўваюцца ў многіх еўрапейскіх авіявузлах, спрабуе аднавіць працу.
Улады аэрапортаў заклікаюць падарожнікаў правяраць статус рэйсаў перад паездкай і набрацца цярпення. Паводле паведамленняў з Бруселя, пакуль рашэнне не будзе знойдзена, трэба рыхтавацца да затрымак і адмены рэйсаў.