Польшча афіцыйна паведаміла ў Мінск пра затрыманне ў Варшаве грамадзянкі Беларусі

Польшча афіцыйна паведаміла беларускім уладам пра тое, што на сваёй тэрыторыі затрымала грамадзянку Беларусі, піша БелТА. Яе абвінавачваюць у тым, што яна кіравала беспілотным лятальным апаратам у зоне, дзе ўстаноўленая забарона на палёты.

Будынак Бельведэрскага палаца ў Варшаве, над якім заўважылі несанкцыянаваны дрон. Фота: Wikimedia Commons

У Міністэрстве замежных спраў Беларусі патлумачылі, што гэты інцыдэнт носіць адміністрацыйна-прававы характар. Працэсуальнымі дзеяннямі займаюцца польскія праваахоўныя органы, Беларусь непасрэдна ўмешвацца ў гэты працэс не збіраецца.

У выпадку неабходнасці грамадзянцы Беларусі абяцаюць аказаць консульскую падтрымку.

Служба аховы Польшчы ўчора вечарам нейтралізавала дрон, які лётаў над урадавымі будынкамі ў цэнтры польскай сталіцы. Паводле апошняй інфармацыі польскай паліцыі, па справе былі затрыманыя дзве асобы: 21-гадовы грамадзянін Украіны і 17-гадовая грамадзянка Беларусі. Затрыманне адбылося ў панядзелак каля 19-й гадзіны. 

Улады пакуль не агучылі мэты маладых людзей, але гаворка можа ісці як пра неабдуманы запуск дрона ў забароненай для палётаў зоне цэнтра Варшавы, так і пра мэтанакіраваны збор інфармацыі або праверку рэакцыі службаў бяспекі.

Каментары да артыкула