Урад вызначыў парадак праверкі ведання дзяржаўнай мовы мігрантамі
Урад зацвердзіў парадак ацэнкі ведаў адной з дзяржаўных моў (беларускай або рускай) для замежных грамадзян, якія працуюць у Беларусі, і вызначыў пералік прафесій і пасад, дзе валоданне мовай з'яўляецца абавязковым. Пра гэта гаворыцца ў пастанове ўрада, апублікаванай на Нацыянальным прававым партале.
Фотьа: Hussein Ibrahim / AP
Абавязковае веданне мовы спатрэбіцца для: працоўных прафесій: кіроўцаў аўтамабіляў, афіцыянтаў, цырульнікаў, прадаўцоў, санітараў, а таксама служачых: адміністратараў, акушэрак, дактароў (усіх спецыяльнасцяў), медсясцёр і медбратоў (усіх спецыяльнасцяў), памочнікаў доктара, фельчараў (усіх спецыяльнасцяў).
Ацэнка ведаў будзе праводзіцца ў спецыяльных пунктах, вызначаных Міністэрствам адукацыі.
Ацэнку будуць праводзіць выкладчыкі ў прысутнасці прадстаўнікоў мясцовых органаў унутраных спраў і аддзелаў па працы.
Пералік пунктаў і колькасць месцаў для мігрантаў вызначыць Міністэрства адукацыі.
Ацэнка ведаў будзе платнай, на падставе дагавора паміж мігрантам і пунктам ацэнкі.
Новыя правілы накіраваны на забеспячэнне камфортнай камунікацыі і інтэграцыі працоўных мігрантаў у беларускае грамадства.