Лукашэнка ў нядзелю на чатыры дні паляціць у Кітай
Лукашэнка збіраецца быць у Кітаі чатыры дні, паведамляе ягоная прэс-служба. У асноўным ягоны візіт звязаны з удзелам у мерапрыемствах Шанхайскай арганізацыі супрацоўніцтва.
Аляксандр Лукашэнка. Фота: Kristina Kormilitsyna, Sputnik, Kremlin Pool Photo via AP
31 жніўня — 1 верасня ў горадзе Цяньцзінь Лукашэнка возьме ўдзел у саміце Шанхайскай арганізацыі супрацоўніцтва (ШАС), які стане найбуйнейшым у гісторыі гэтай арганізацыі.
Чакаецца, што на гэтым саміце кіраўнікі дзяржаў, якія складаюць гэтую арганізацыю, прымуць Цяньцзінскую дэкларацыю і зацвердзяць стратэгію развіцця ШАС на наступныя 10 гадоў — да 2035 года. Акрамя гэтага, будуць абмеркаваныя пытанні бяспекі, эканамічнага і гуманітарнага супрацоўніцтва, прынятыя адпаведныя рашэнні, сумесныя заявы і падпісаныя міждзяржаўныя пагадненні.
Таксама Лукашэнка возьме ўдзел у саміце ў фармаце «ШАС плюс», дзе да ўдзельнікаў далучацца кіраўнікі дзяржаў-назіральніц, прадстаўнікі міжнародных арганізацый і высокія госці, запрошаныя Кітаем. Агульная колькасць удзельнікаў — больш за тры дзясяткі кіраўнікоў дзяржаў і міжнародных арганізацый.
Акрамя таго, 3 верасня Лукашэнка збіраецца прысутнічаць у Пекіне на святочных мерапрыемствах, прысвечаных 80-й гадавіне Перамогі над Японіяй і заканчэнню Другой сусветнай вайны, у тым ліку на парадзе на плошчы Цяньаньмэнь.
Чытайце таксама:
Афрыканскі Лукашэнка прысудзіў свайму сыну шэсць гадоў турмы
Беларусы гадамі надурвалі кітайцаў з курынымі лапкамі. Але скончылася гэта кепска