Былога гендырэктара прадпрыемства асудзілі на 7 гадоў за хабар
Як паведамляе Генеральная пракуратура, з 9 лютага 2024 года па 3 студзеня 2025 года былы гендырэктар прадпрыемства па будаўніцтве і рамонце дарог, знаходзячыся на ўчастку садовага таварыства ў Мінскім раёне, некалькі разоў атрымліваў хабар ад прадстаўнікоў гаспадарчых суб’ектаў на агульную суму больш за 38 тысяч рублёў.
Фота ілюстрацыйнае
Хабары былы гендырэктар атрымліваў за спрыяльнае вырашэнне пытанняў у сваёй кампетэнцыі, у тым ліку за першачарговае пагашэнне запазычанасці па ранейшых дамовах і выкананых працах у сферы грузаперавозак.
Часткай атрыманых сродкаў (больш за 5 тысяч рублёў) ён не паспеў распарадзіцца, бо быў затрыманы праваахоўнымі органамі непасрэдна падчас атрымання чарговага хабару.
На судзе абвінавачаны прызнаў сваю віну часткова.
Суд Мінскага раёна прызнаў яго вінаватым і прысудзіў па ч. 1 і ч. 2 арт. 430 Крымінальнага кодэкса РБ 7 гадоў пазбаўлення волі са штрафам у памеры 700 базавых велічынь (29,4 тыс. рублёў) і забаронай займаць кіраўнічыя пасады на 5 гадоў.
Больш за 5 тысяч рублёў, якія былі знойдзеныя пры затрыманні, у мужчыны канфіскаваныя. Акрамя таго, абвінавачаны павінен быў вярнуць дзяржаве больш за 12 тысяч рублёў, атрыманыя незаконным шляхам, з улікам таго, што часткова сума была кампенсаваная добраахвотна.
Чытайце таксама:
Мінскі топ-менеджар адседзеў за карупцыю, выйшаў і зноў пачаў браць хабар у тых жа самых людзей
Першага намесніка начальніка Белчыгункі Дулуба асудзілі на 10 гадоў калоніі