У Гамбургу затрымалі беларуса з марыхуанай і какаінам
У Гамбургу паліцыя затрымала 28-гадовага беларуса, у якога знайшлі буйную партыю наркотыкаў. Пры ім было каля 19 кілаграмаў марыхуаны і паўкілаграма какаіну, паведамляе сайт «Беларусь и мир».
Фота: innenministerium.bayern.de
Усё пачалося ўвечары 21 жніўня, калі паліцыянты заўважылі ў раёне Тандорф шэсць маладых мужчын (19—27 гадоў, усе — грамадзяне Германіі), паводзіны якіх падаліся падазронымі. Падчас праверкі ў іх і ў аўтамабілі Škoda знайшлі больш за 15 тысяч еўра наяўнымі, поліэтыленавыя пакеты і вакуумны ўпакоўшчык. У праваахоўнікаў узнікла версія, што гэта была сустрэча для здзелкі з наркотыкамі, таму ўсіх шасцярых папярэдне арыштавалі.
Наступнае расследаванне прывяло паліцыю да кватэры на вуліцы Мартэнсалее. Побач з ёй заўважылі беларуса, які выносіў дзве вялікія скрынкі. Пры аглядзе ўсярэдзіне знайшлі наркотыкі — 19 кілаграмаў марыхуаны і каля 500 грамаў какаіну. Яго таксама затрымалі, а пры ператрусе ў самой кватэры знайшлі дадатковыя доказы.
На наступны дзень перад судом паўсталі двое падазроных — 22-гадовы немец і беларускі грамадзянін. Суддзя пакінуў немца пад вартай, а беларуса вызваліў. Астатніх пецярых затрыманых пасля працэдур таксама адпусцілі. Следства працягваецца.
Чытайце таксама:
На мяжы з Польшчай затрымалі аўстрыйца з марыхуанай
Беларускія памежнікі затрымалі мужчыну, які ехаў з Літвы разам з самакруткай марыхуаны
З Польшчы дэпартуюць беларуса, якога затрымалі ў парку з марыхуанай