Адзін з самых уплывовых мастакоў свету Ай Вэйвэй наведаў Украіну і пабываў на фронце
Вэйвэй, якога называюць галоўным мастаком сучаснасці, пабываў на баявых пазіцыях на поўначы ад Харкава і пагутарыў з вайскоўцамі 13-й брыгады аператыўнага прызначэння «Хартыя».
Ай Вэйвэй і Пётр Вярзілаў. Фота: petyaverzilov / Instagram
Пра візіт артыста паведаміў у інстаграме расійскі акцыяніст і былы выдавец «Медыязоны» Пётр Вярзілаў, які цяпер служыць у УСУ.
«Вялікі Ай Вэйвэй — разумны, дзёрзкі і адважны — якім і павінен быць дзеяч культуры №1 на планеце Зямля», — напісаў Вярзілаў.
Ён апублікаваў некалькі фота з мастаком.
Ай Вэйвэй і Пётр Вярзілаў. Фота: petyaverzilov / Instagram
Сам Вэйвэй зрабіў некалькі публікацый у інстаграме, прысвечаных сваёй вандроўцы ва Украіну.
Ай Вэйвэй вядомы сваёй пазіцыяй супраць улады КНР і барацьбой за правы чалавека. Па версіі часопіса Time, ён займае 24-ы радок у спісе самых уплывовых людзей свету. З 2015 года ён жыве пераважна за межамі Кітая.
Вэйвэй працуе ў розных жанрах — ад інсталяцый і скульптуры да архітэктуры і дакументальнага кіно. Сярод самых вядомых яго праектаў: дызайн стадыёна «Птушынае гняздо» у Пекіне для Алімпіяды-2008, інсталяцыя «Насенне сланечніка» у лонданскай галерэі Tate Modern, а таксама шматлікія праекты, прысвечаныя бежанцам і ахвярам войнаў.
Ай Вэйвэй ва Украіне. Фота: petyaverzilov / Instagram