«Дык цяпер у Крупкі ехаць, ці што?» У райцэнтры знайшлі такі атмасферны бар, якога няма і ў сталіцы
Відэа з незвычайным і вельмі самабытным барам у раённым цэнтры Крупкі ў Мінскай вобласці набрала за суткі 300 тысяч праглядаў, дзясяткі тысяч лайкаў і тысячы каментароў. У бара ёсць яшчэ адна асаблівасць — ён адкрываецца і закрываецца, калі захоча гаспадар, расказалі шчасліўцы, якім удалося туды трапіць, заўважыў «Тэлеграф».
Карыстальнікаў уразіў як знешні выгляд будынка, у якім знаходзіцца бар, так і ўнутранае ўбранне.
«Відэа знята пару дзён таму. Адзінае, знаёмы потым сказаў, што дакладнага графіка працы бара няма: адкрываецца і закрываецца, калі хоча) Але паспрабаваць удачу можна!» — распавяла аўтарка роліка.
Мноства ліхтарыкаў, эклектычныя ўпрыгожанні, ад якіх мітусіцца ў вачах, не адпудзілі гледачоў. Дарэчы, крыху сумбурны дызайн насамрэч выклікае прыемныя ўражанні і, вядома ж, здзіўленне.
«Дык цяпер у Крупкі ехаць, ці што?» — спытала адна з глядачак і атрымала каля тысячы лайкаў.
Яшчэ адзін з каментатараў расказаў, што гэты бар упрыгожваў усяго адзін чалавек уручную. «Я быў тут) атмасфернае месца! Крупкі, прывітанне вам, класны гарадок з добрымі людзьмі», — напісаў яшчэ адзін.
Многім настолькі спадабаўся выгляд бара, што прапанавалі зняць там «Крымінальнае чытво» па-беларуску.
А нехта пажартаваў, што такі бар моцна здзівіў менавіта жыхароў сталіцы: «Ого. Мінчукі ў шоку. За МКАДам ёсць таксама жыццё».
Знайшліся і тыя, хто своеасабліва пахваліў увесь раённы цэнтр: «Крупкі — гэта наогул як асобная адзінка ў культуры. Лепшая школа, выдатная бальніца, дзе літаральна няма нічога, але медыкі робяць цуды, прырода, жыхары. Была там некалькі разоў і кожны раз здзіўлялася. Цяпер яшчэ ёсць нагода заехаць паспрабаваць удачу трапіць у бар».