У Гомелі за палітыку пасадзілі адваката
Сяргей Хлыстоў атрымаў прысуд па двух артыкулах.
Сяргей Хлыстоў. Фота: brka.by
У Гомельскім абласным судзе вынеслі прысуд 58-гадоваму адвакату Сяргею Хлыстову. Яго абвінавачвалі па двух палітычных артыкулах — распальванне варожасці (частка 1 артыкула 130 Крымінальнага кодэкса) і заклікі да прычынення шкоды нацыянальнай бяспецы Беларусі (частка 3 артыкула 361).
Раней Сяргей Хлыстоў працаваў у адвакацкім бюро «Ліга права груп», але калі інстытут адвакацкіх бюро быў знішчаны, перайшоў у юрыдычную кансультацыю Навабеліцкага раёна Гомеля.
Па інфармацыі «Вясны», Хлыстова затрымалі разам з іншымі двума адвакатамі, у тым ліку загадчыкам юрыдычнай кансультацыі. Пазней дваіх адвакатаў вызвалілі, але загадчыка юркансультацыі звольнілі з пасады.
Хлыстова дадалі ў міліцэйскі спіс «экстрэмістаў», там пазначана, што ён ужо адбывае пакаранне. Дакладна прысуд невядомы.