«Мы планавалі да 9 мая гэта зрабіць, але кіроўцы пайшлі на Вялікдзень у запой». Кіраўнік СБУ расказаў падрабязнасці пра аперацыю «Павуцінне»

Кіраўнік Службы бяспекі Украіны Васіль Малюк даў інтэрв'ю ўкраінскім СМІ, падчас якога расказаў некаторыя падрабязнасці пра падрыхтоўку і правядзенне 1 чэрвеня аперацыі «Павуцінне», якая нанесла вялікія страты расійскай вайсковай авіяцыі.

Васіль Малюк. Фота: lb.ua

Як расказаў Малюк, назву «Павуцінне» спецаперацыя атрымала яшчэ на этапе планавання, калі кіраўнік СБУ з калегам намалявалі на нататніку лагістычныя сувязі да варожых аэрадромаў.

Увогуле аперацыю «Павуцінне» планавалі правесці да 9 мая, але нібыта сталася так, што расійскія кіроўцы фур, з якіх выляталі дроны, на Вялікдзень пайшлі ў запой. Праз гэта спецаперацыю давялося перанесці на месяц.

Для яе правядзення СБУ стварыла ў Чалябінску фэйкавую лагістычную кампанію, арандаваўшы офіс і склады проста пад носам у мясцовага упраўлення ФСБ.

Тэхнічна былі выкарыстаныя ўнікальныя FPV-дроны ўласнай распрацоўкі, якія мелі спецыяльную сістэму сувязі і баявы зарад. Зарад складаўся з дзвюх частак па 800 грамаў (гэта значыць усяго 1600) спецыяльнай сумесі, якая мае кумулятыўна-фугасны эфект, каб прапаліць сам корпус самалёта і выклікаць выбух ўсярэдзіне.

Той чалавек, хто рабіў «домікі» для запуску дронаў з фур, для захавання сакрэтнасці аперацыі сам не ведаў, навошта ён іх робіць. Былі вырабленыя цалкам аўтаномныя паляўнічыя домікі з батарэямі, якія бесперапынна падсілкоўвалі дроны, бо спецаперацыя магла адбыцца і ў халодную пару года.

Агенты СБУ паспелі паспяхова пакінуць тэрыторыю Расіі яшчэ да таго, як грузавікі выехалі да аэрадромаў.

Каментары да артыкула