«Горад працоўнай славы 1941—1945». У Баранавічах адкрылі манумент з дзіўнай назвай
Напярэдадні 3 ліпеня ў Баранавічах адбылася ўрачыстая цырымонія адкрыцця манумента ў гонар прысваення ганаровага звання СНД «Горад працоўнай славы 1941—1945 гадоў», звярнулі ўвагу ў тэлеграм-канале Беларускага інстытута публічнай гісторыі. Але, як вядома, Баранавічы падчас вайны былі акупаваныя і вызваленыя толькі ў 1944-м. Адкуль такая дзіўная назва?
Афіцыйныя каментары даволі блытаныя. Паведамляецца, што «гэта даніна пакаленню пераможцаў, пакаленню працаўнікоў, якія ў найкарацейшыя тэрміны аднавілі горад з попелу і руін». Але навошта тады спатрэбілася дзіўная прывязка да 1941—1945 гадоў?
Разгадка, відаць, у наступным. Год таму на саміце СНД прэзідэнт Расіі Уладзімір Пуцін прапанаваў заснаваць званне «Горад працоўнай славы»: «Гэта стане сімвалам прызнання і павагі… усіх тых, хто працаваў у тыле».
Вядома, што новае званне СНД прысвоена такім тылавым гарадам, як Астана, Алматы, Караганда. Аднак у спіс чамусьці трапілі і Баранавічы. Так і ўзнік манумент з дзіўнай назвай і блытанымі тлумачэннямі ўладаў.
Чытайце таксама:
Загадкавая 8-метровая металічная скульптура з'явілася ў Валожыне
У Мінску з'явіўся чарговы помнік міліцыянеру. У сталіцы іх ужо шэсць