Дроны УСУ ўдарылі па двух расійскіх аб’ектах ВПК
Адно з іх — вядучае прадпрыемства па вытворчасці кампанентаў выбуховых рэчываў.
У ноч на 14 чэрвеня ўкраінскія беспілотнікі нанеслі ўдары па двух аб’ектах ваенна-прамысловага комплексу Расіі, паведамляе «Украінская праўда».
У прыватнасці, пашкоджаны магутнасці ААТ «ННК» у Самарскай вобласці.
Гэта вядучае прадпрыемства па вытворчасці кампанентаў выбуховых рэчываў, аб’ект ВПК Расіі. Зафіксаваны выбухі і пажар у раёне прамысловай зоны.
Таксама здзейснена агнявое паражэнне камбіната Невіннамыск у Стаўрапольскім краі — аднаго з ключавых вытворцаў базавых кампанентаў для выбуховых рэчываў, боепрыпасаў і ракетнага паліва.
Генштаб падкрэслівае, што гэта прадпрыемства задзейнічана ў забеспячэнні ўзброенай агрэсіі супраць Украіны. Вядома пра серыю выбухаў і работу супрацьпаветранай абароны праціўніка непасрэдна ў раёне мэты, зафіксавана загаранне ў прамысловай зоне.
Вынікі ўдакладняюцца.