Польскія памежнікі заявілі, што з беларускага боку мігрантам дапамагалі людзі ў форме
Відэа пераходу мігрантаў праз памежны плот апублікаваў Падляскі аддзел памежнай аховы Польшчы, заўважыў Reform.
Скрыншот з відэа: Straż Graniczna
Здарэнне адбылося раніцай 14 траўня на ўчастку заставы ля Чарамшы. Па відэа, апублікаваным памежнікамі, бачна, як тры персоны праразаюць плот і пералазяць праз яго.
«Мігранты з дапамогай шліфавальнай машынкі знішчылі тэхнічныя сродкі бяспекі на мяжы. У іх таксама была з сабой лесвіца. У складзе групы замежнікаў у тэхнічнай загароды з беларускага боку знаходзіліся двое асоб у форме, якія садзейнічалі незаконнаму перасячэнню мяжы», — пішуць памежнікі.
Аднаго з мігрантаў затрымалі ў памежнай паласе, а яшчэ двух — трохі пазней. Сярод затрыманых — двое грамадзян Афганістана і адзін грамадзянін Пакістана.