Роберт Ф. Кенэдзі-малодшы зацверджаны на пасадзе міністра аховы здароўя ЗША
Роберт Ф. Кенэдзі-малодшы, які падчас перадвыбарчай барацьбы ў ЗША адмовіўся ад вылучэння ўласнай кандыдатуры і падтрымаў Дональда Трампа, у чацвер быў зацверджаны Сенатам на пасаду міністра аховы здароўя і сацыяльных службаў.
Фота: Jose Luis Magana / AP
За яго кандыдатуру прагаласавалі 52 заканадаўцы, супраць выказаліся 48. Мітч Макконэл (былы лідар рэспубліканцаў у верхняй палаце Кангрэса) стаў адзіным рэспубліканцам, які выступіў супраць зацвярджэння Кенэдзі-малодшага і далучыўся да 47 дэмакратаў, што галасавалі супраць яго.
Кэнэдзі, які раней быў вядомы сваёй крытыкай вакцынацыі, паабяцаў абараняць існуючыя праграмы вакцынацыі, адзначае «Голас Амерыкі».
71-гадовы Кенэдзі — юрыст, спецыяліст у сферы экалагічных праблем. Цяпер ён узначаліць ведамства, у кампетэнцыю якога ўваходзяць праграмы Medicare і Medicaid, што забяспечваюць медыцынскае страхаванне для больш чым 140 мільёнаў амерыканцаў. Міністэрству, кіраўніком якога стане Кэнэдзі, таксама падпарадкоўваюцца Нацыянальныя інстытуты здароўя (NIH), адзначаецца ў паведамленні.