Улады Літвы не выключаюць тэракта на борце самалёта DHL, які ўпаў у Вільні
Улады Літвы не выключаюць тэракта, хаця папярэдне прычына — тэхнічная. Крымінальная справа заведзена па артыкуле, які прадугледжвае адказнасць за неналежнае абслугоўванне транспартных сродкаў.
Супрацоўнікі МНС Літвы і паліцыянты стаяць каля месца, дзе грузавы самалёт DHL упаў недалёка ад аэрапорта, 25 лістапада 2024 г. Фота: AP Photo / Mindaugas Kulbis
Генкамісар паліцыі Літвы Арунас Паўлаўскас і кіраўнік Дэпартамента дзяржаўнай бяспекі (ДДБ) Дарус Яўнішкіс паведамілі, што разглядаюць тэракт сярод версій прычын катастрофы раніцай 25 лістапада ў Вільні самалёта нямецкай службы дастаўкі DHL.
Кіраўнік Нацыянальнага цэнтра кіравання крызісамі Вілмантас Віткаўскас назваў тое, што здарылася няшчасным выпадкам. Паводле яго слоў, прычына інцыдэнту можа быць звязана з «тэхнічнымі пытаннямі».
Генкамісар паліцыі Літвы Арунас Паўлаўскас заявіў, што, хутчэй за ўсё, аварыя адбылася з-за тэхнічнай або чалавечай памылкі. Але ён не выключыў і версію з тэрактам. «Напэўна, яе ніколі нельга выключаць. Гэта адна з версій, якая павінна быць вывучана, праверана», — сказаў Паўлаўскас.
Кіраўнік Дэпартамента дзяржаўнай бяспекі Дарус Яўнішкіс таксама лічыць, што пацвярджаць версію тэракта пакуль рана, але яна магчымая. «Мы не можам выключаць, скажам, выпадак тэрарызму. Вядома, ДДБ сумесна з Дэпартаментам аператыўнай службы нас таксама папярэджвалі, што такое магчыма ў будучыні, мы бачым, што Расія становіцца больш агрэсіўнай», — сказаў ён.
Крымінальная справа заведзена па артыкуле, які прадугледжвае адказнасць за неналежнае абслугоўванне транспартных сродкаў.
Раней The Wall Street Journal расказвала, як Расія спрабавала зладзіць тэракты на авіярэйсах DHL у Еўропе.
Чытайце таксама:
У Вільні грузавы «Боінг» упаў на двухпавярховы жылы дом і загарэўся. Ёсць загінулыя
Папярэдняя прычына падзення самалёта ў Вільні — тэхнічнае пытанне