Chto na Charkaŭ?
Biełaruskija hulcy nadoječy viarnulisia z Charkava, dzie ŭ siomy raz pad dacham Nacyjanalnaj jurydyčnaj akademii imia Jarasłava Mudraha ładziŭsia Kubak rektara.
Hetaje spabornictva, što zvyčajna pryciahvaje mocnych maładzionaŭ — rasiejcaŭ, ukraincaŭ i biełarusaŭ — čarhovaje paćvierdžańnie taho, što z šachmatami va Ŭkrainie zbolšaha ŭsio ŭ paradku. Niezdarma letaś ukraincy zavajavali «zołata» na Alimpijadzie, a ŭ rejtynh-śpisie FIDE ich kraina pa sukupnaści vynikaŭ zajmaje druhoje miesca (paśla Rasiei). Biełaruś ža ŭ tym śpisie vylecieła z druhoha dziasiatka.
Praŭda, i ŭ našaj pamarančavaj susiedcy zdarajucca niedarečnaści. Tak, ledź nie ŭ apošni momant z traŭnia na vierasień byŭ pieraniesieny bujny mižnarodny turnir u Kijevie. Arhanizatary «patłumačyli»: u traŭni projdzie «Eŭrabačańnie», nia chočam nakładak. Nibyta siarod muzykaŭ dy ichnich fanataŭ brakuje šachmatystaŭ, i naadvarot…
U sioletnim Kubku rektara brali ŭdzieł Ina Ramanava, Viktar Kuprejčyk, Jury Cichanaŭ. Hrosmajstarka Ina fajna zhulała ŭ žanočaj lizie — siarod dvanaccaci ŭdzielnic zaniała 3-je miesca z 7 bałami, začapiŭšysia za stodalaravy pryz.
Što da mužčynaŭ, to sp.Viktar, najstarejšy ŭdzielnik turniru, akazaŭsia tolki siomym, zatoje sp. Jury — čaćviertym. Naporystaść mienčuka ź Niamihi dała plon: piać pieramoh, try parazy, try ničyi (jak ni dziŭna, adzin ź jaho partneraŭ, 15-hadovy chłopiec-rasiejec, źvioŭ uničyju ŭsie 11 hulniaŭ — i varta było dziela hetaha tak daloka jechać?).
Pahladzicie partyju vice-čempijona Biełarusi, dzie čornyja akazalisia raźbitymi ŭ dvaccać chadoŭ. Hrosmajstry — taksama ludzi.