Budaŭniki ŭ Horkach pahražajuć haładoŭkaj
Jany skardziacca na małyja zarobki. Rabočyja pracujuć na rekanstrukcyi internata ŭ Horkach i atrymlivajuć kala 300 tysiač rubloŭ u miesiac.
Vosiem mahiloŭskich budaŭnikoŭ źviarnulisia sa skarhaj da kiraŭnika vobłaści Barysa Batury i načalnika inśpiekcyi pracy.
Jany skardziacca na małyja zarobki i kažuć, što hatovyja pajści na haładoŭku. Rabočyja pracujuć na rekanstrukcyi internata ŭ Horkach i atrymlivajuć kala 300 tysiač rubloŭ u miesiac. Jany spasyłajucca na poŭnuju zahruzku na pracy i svaju vysokuju kvalifikacyju.
«Nam hetych hrošaj nie chapaje navat na charčavańnie, a ŭ mnohich jość siemji, dzieci — jak hladzieć im u vočy i što tłumačyć?», — pišuć u zvarocie rabočyja‑budaŭniki.