Ab usim patrochu

ab usim patrochu

 

Apapieńnie

2 kastryčnika rada respubliki nacyjanalnaha schodu ŭchvaliła sumnaviadomy zakon “ab svabodzie sumleńnia”, jaki robić z pravasłaŭja “asnovatvornuju relihiju”. Suprać rašuča vystupała tolki Jadviha Hryharovič. “Za” dakument hałasavali 46 parlamentaroŭ, “suprać” — 2. Fiłaret budzie rady. U svaim interviju napiaredadni hałasavańnia jon padkreśliŭ, što pravasłaŭnaja carkva aceńvaje prajekt novaha zakonu “vyklučna stanoŭča”.

Da źnikłych niama spravy

Pałata pradstaŭnikoŭ admoviłasia stvaryć kamisiju pa spravie źnikłych palitykaŭ i žurnalistaŭ. Biełaruś — adzinaja kraina biełaje Eŭropy, dzie tajamniča źnikajuć lidery apazycyi. Parlamentaroŭ heta, vidać, nie kranaje.

“Chartyja” pa-biełarusku

Internet-štodziońnik “Chartyi-97” (www.charter97.org) iznoŭ maje biełaruskamoŭnuju versiju. Vinšujem! Zyčym taho samaha inšaj papularnaj internet-hazecie www.naviny.by.

Vizyt z padkavyrkaj

Ministar abaronnaj pramysłovaści Iraku naviedaŭ Miensk. U prahramie vizytu byli vyklučna humanitarnyja mierapryjemstvy.

Vykradańnie ŭ Kukurystanie?

Hazeta “Iźviestija” paviedamiła, što skradzieny vice-prezydent rasiejskaha naftavaha kancernu “Łukojł” Siarhiej Kukura dva tydni ŭtrymlivaŭsia zachopnikami ŭ kinutaj čarnobylskaj vioscy na Mahiloŭščynie. Toje, što jon u Biełarusi, Kukura (sam rodam ź Bieraścia) nibyta zrazumieŭ z razmovaŭ vykradalnikaŭ.

Pieršy rasiejski špijon asudžany

Były inspektar Kamitetu kaštoŭnych papieraŭ Jaŭhien Kukuškin zarabiŭ piać hadoŭ turmy za sprobu pradać sakretnuju słužbovuju infarmacyju rasiejskaj kamercyjnaj firmie. KDB atrymaŭ źviestki ab hetym złačynstvie ź Internetu. Na sajcie adnoj z maskoŭskich firmaŭ Kukuškin źmiaściŭ kataloh abaronnych pradpryjemstvaŭ Biełarusi, u jakim byli źviestki pra 1600 subjektaŭ haspadarańnia, u tym liku abaronnych. Rasiejskaja gazeta.ru paviedamiła pra vypadak pad zahałoŭkam “U Biełarusi asudžany rasiejski špijon”.

Eŭrapadrobka

Falšyvyja 50 eŭra vykryli ŭ adnoj ź filijaŭ “Biełarusbanku” stalicy. Heta pieršaja znojdzienaja ŭ Biełarusi padrobka novaj valuty Eŭraźviazu, jakaja, jak ličycca, maje najlepšuju ŭ śviecie stupień abarony.

Jak pry Stalinu

134-metrovy bulvar za pomnikam Hrycaŭcu na vulicy Lenina ŭ Miensku rekanstrujujuć u styli stalinskich časoŭ. Zamiest starych lipaŭ pasadziać maładyja, asfalt zamieniać plitkaj, pastaviać dva maleńkija fantany, lichtary, vazy z kvietkami dy nievialičkija handlovyja bufety. Sam bulvar abniasuć dvuchmetrovaj ścianoju, naviersie jakoj budzie litaja aharodža. Budoŭla budzie kaštavać 1 młrd. rubloŭ, skončać jaje nastupnym letam.

Centar Eŭropy pajechaŭ
na poŭnač

Biełaruskija hieadezisty vyličyli, što centar Eŭropy lažyć la voziera Šo na Hłyboččynie. Raniej hučali hučnyja zajavy, što centar toj — na Staradarožčynie. “Niechta chvalicca roznymi tryjumfalnymi arkami…”, — jak pisaŭ paet.

“Zona” źmienšyłasia

“Čarnobylski” status straciŭ 81 nasieleny punkt Biełarusi, jašče ŭ 146 adznačana źmianšeńnie radyjacyjnaj zabrudžanaści ŭ vyniku raspadu radyjeaktyŭnaha ceziju. Strata “čarnobylskaha” statusu paciahnie skaračeńnie sacyjalnych ilhotaŭ dla nasielnictva terytoryj, što pryznanyja ŭmoŭna čystymi. Ciapier u zonie radyjacyjnaj zabrudžanaści zastalisia 2802 nasielenyja punkty, u ich žyvie kala 1,5 młn. čałaviek.

Litva dla litoŭcaŭ

Prezydent Litvy Vałdas Adamkus padpisaŭ novy zakon ab hramadzianstvie, jaki moža istotna zakranuć intaresy biełarusaŭ Vilenščyny. Zhodna ź im, prava na padvojnaje hramadzianstva buduć mieć tolki etničnyja litoŭcy. Hramadzianie inšych nacyjanalnaściaŭ, što pierajaždžajuć na stałaje žycharstva za miažu, buduć hublać litoŭskaje hramadzianstva. Praciŭniki zakonu z šerahaŭ nacyjanalnych mienšaściaŭ rychtujuć skarhu ŭ Kanstytucyjny sud.

Zabojstva syna bankira

U Frankfurcie (Niamieččyna) złamyśnik vykraŭ i zabiŭ 11-hadovaha syna viadomaha bankira Frydrycha fon Meclera, kiraŭnika apošniaha pryvatnaha banku Niamieččyny “Metzler Bank”. Apošni raz Jakaba bačyli na adnym z aŭtobusnych prypynkaŭ, kali jon viartaŭsia damoŭ z škoły. Nieŭzabavie chłopčyka znajšli niežyvym, choć vykup u miljon eŭra byŭ pryhatavany. Palicyja aryštavała studenta, znajomaha chłopčyka, jaki, jak miarkujecca, učyniŭ hetaje zabojstva.

Levyja suprać Buša

Čatyry sotni amerykanskich intelektuałaŭ, aktoraŭ, piśmieńnikaŭ, navukoŭcaŭ ź levymi pohladami vystupili z adkrytym listom, u jakim asudžajuć zamiežnuju palityku administracyi Buša i vystupajuć suprać umiašańnia ZŠA ŭ Iraku. List padpisali Brajan Ina, Džejn Fonda, Hor Vidał, Naam Čomski, Robert Ołtmen, Edvard Said dy inš.

Dva miljony za Štaniuka

Biełaruskim futbalistam Siarhiejem Štaniukom zacikaviŭsia anhielski klub premjer-lihi “Fułchiem”. Ciapier 30-hadovy futbalist hulaje ŭ druhim dyvizijonie anhielskaha čempijanatu.

“Uembli” razburać

U paniadziełak pačałosia razbureńnie samaha viadomaha anhielskaha stadyjonu, uźviedzienaha ŭ 1923 h. Pabudova stadyjonu zaniała 300 dzion i kaštavała 750 tys. funtaŭ. Jahony nastupnik budzie kaštavać investaram 750 młn. funtaŭ.

Aŭtasalon u Paryžy

Siarod sioletnich navinak adnoj z najbujniejšych u śviecie paryskaj aŭtavystavy jość šerah aŭtamabilaŭ, jakija zacikaviać svajoj dastupnaj canoj biełaruskich aŭtaamataraŭ. Heta najpierš “Nisan Mikra” z aryhinalna sprajektavanym kuzavam, “Seat Kordaba”, “Mazda-2” — pieršaja mašyna hetaj firmy, što vyrablajecca ŭ Eŭropie. Samaja cikavaja navinka “Opela” — busik “Meryva” — maje trapić na biełaruski rynak naleta. “Reno” pradstaviła druhuju versiju svajoj kampaktnaj madeli “Mehan”, pakul tolki troch- i piaciochdźviercavy chečbek, čaćviertuju hieneracyju busa “Espas” i nievialiki studyjny “Elips”. Samy cikavy debiut “kombi” — “Fijat Stylo Stejšen”. Navinka ad “Pežo” — “Sezam”, aŭtamabil dla haradzkich umovaŭ.