Stary lider, novaja stratehija

Sojm “Maładoha frontu”

Stary lider, novaja stratehija

U niadzielu ŭ Miensku adbyŭsia IV sojm “Maładoha frontu”. U zmahańni za pasadu staršyni pieramoh Pavał Sieviaryniec. Adnak za stratehiju dziejnaści arhanizacyi była pryniataja kancepcyja jahonaha apanenta Vadzima Sarančukova.

U Mižnarodny adukacyjny centar pryvitać maładafrontaŭcaŭ zavitała niašmat haściej: Vincuk Viačorka, Viačasłaŭ Siŭčyk, narodny paet Nił Hilevič, Aleh Trusaŭ, Alaksiej Karol. Pryjšli “zubry” na čale ź Cimocham Drančukom. Jany horača padtrymlivali Sieviarynca i nie sychodzili z sojmu, až pakul nie byli abvieščanyja vyniki hałasavańnia. Pa słovach C.Drančuka, padtrymka Sieviarynca — aficyjnaja pazycyja “Zubra”, bo “Sarančukoŭ u vypadku pieramohi abvieściŭ by pra sychod “Maładoha frontu” z vulicy, jahonuju pieraaryjentacyju na pryniaćcie zajavaŭ, palityčnuju vučobu i h.d. Šerah delehataŭ vykazvaŭ sumnieŭ u ščyraści hetaj zajavy. Samym znakamitym hościem byŭ abaronca Kurapataŭ Aleś Pokład, jaki “źbieh” z bolnicy, kab paprysutničać na mierapryjemstvie. U svaim vystupie Vincuk Viačorka skazaŭ, što imia Alesia Pokłada ŭvojdzie ŭ našu najnoŭšuju historyju.

Na sojm zavitała i supracoŭnica hazety “Navinki”. Spačatku jana akuratna zdymała na ličbavuju kameru ŭsich vystupoŭcaŭ, siabroŭ prezydyjumu, nie vyjaŭlajučy svajoj prynaležnaści da zhadanaha vydańnia. Paźniej, aśmialeŭšy, pasprabavała realizavać siarod delehataŭ i samu hazetu. Ale achova, što składałasia ź siabroŭ SPA “Vajar” u admysłovaj vajenizavanaj uniformie, nie dazvoliła: u “Navinkach” jakraz łajali “Małady front”.

A paśla abiedu pierad uvachodam u zalu chłopcy pravieryli pakunki delehataŭ na pradmiet najaŭnaści alkaholnych napojaŭ. Inšych ekscesaŭ nia zdaryłasia.

Abiedali delehaty na dvare (na šykoŭnyja abiedy ŭ maładafrontaŭcaŭ niama hrošaj). Pavał Sieviaryniec trochi šakavaŭ prysutnych, skazaŭšy: “Zaraz idziom na vulicu abiedać”. Tam jakraz išoŭ mocny doždž... Na ščaście, doždž nieŭzabavie skončyŭsia.

Sojm prachodziŭ u nervovaj atmasfery. Ad samaha pačatku zala była padzielenaja na dva lahiery, što apantana padtrymlivali svaich lideraŭ. Źjaŭleńnie ŭ Sieviarynca kankurenta było abumoŭlena nia tolki naśpiełym u častki siabroŭ “MF” žadańniem pieramienaŭ, ale i daŭnimi frontaŭskimi nieparazumieńniami miž “baćkami” i “dziećmi”. Tak, u śniežni 2001 h. na źjeździe BNF “Adradžeńnie” Sieviaryniec padtrymaŭ kankurenta Vincuka Viačorki Viačasłava Siŭčyka, adnak apošni prajhraŭ...

Apanenty Paŭła Sieviarynca dobra padrychtavalisia da sojmu i zmahalisia za pieramohu piśmienna dy arhanizavana. Sapraŭdnaja baraćba razharnułasia padčas dyskusii nakont stratehii dziejnaści “Maładoha frontu” na 2002—04 h. Vadzim Sarančukoŭ prapanavaŭ arhanizacyjna ŭparadkavać “Małady front”, stvaryŭšy Palityčnuju radu. Prajekt Sieviarynca byŭ bolš składany i hlabalny. Siarod hałoŭnych zadačaŭ jon nazvaŭ “raspracoŭku nacyjanalnaj idei dla kožnaha kankretnaha čałavieka”, padrychtoŭku da prychodu “Maładoha frontu” va ŭładu, pieratvareńnie jaho ŭ “mahutnuju palityčnuju siłu”, niezaležnuju ad BNF. “Hetaja stratehija nastupalnaja!” — padkreśliŭ P.Sieviaryniec. Jakoje ž było jahonaje rasčaravańnie, kali bolšaść — 74 čałavieki — padtrymała prajekt kamandy V.Sarančukova! Za prapanovy arhkamitetu prahałasavaŭ tolki 61 delehat. Adnak na trybunie Sarančukoŭ trymaŭsia słabiej za Sieviarynca. I pry tajnym hałasavańni delehaty, pryniaŭšy stratehiju dziejnaści Sarančukova, padtrymali nie jaho, a Sieviarynca. 71 delehat prahałasavaŭ za Vadzima Sarančukova i 89 — za Paŭła Sieviarynca. Vosiem čałaviek prahałasavali suprać usich, a čatyry biuleteni byli pryznanyja niesapraŭdnymi.

Možna prahnazavać, što Sieviaryniec budzie šukać parazumieńnia z kiraŭnictvam BNF “Adradžeńnie” dy dziejničać zhodna z stratehijaj, raspracavanaj jahonym apanentam. A jašče jon paabiacaŭ pravieści “hłybiejšyja” reformy ŭ “Maładym froncie” i pryznaŭsia, što ŭ im samim “idzie kapitalnaja pieramiena”.

Aleh Tačony