Naviny za tydzień
№ 12 (221), 19 — 26 sakavika 2001 h.
Naviny za tydzień
Hienadziu Kisialovu — 70
Siejbitu viečnaha
Navat nia kožnamu j pryśnicca,
Chaj rodzić talenty miž nas,
Kab i Čačot i Vieranicyn
Pazvali družna na Parnas.
Tam ludu roznaha niamała
Taŭpiecca navakoł bahoŭ —
Jaho ž Skaryna i Kupała
Pryvieciać ščyra za svajho.
Jon Karatkievičam abłaščan,
Jamu na śvietły ŭspamin
Naš Letapisiec — sam Ułaščyk
Skłaŭ zapavietny perkhamin.
I nie adzin sučaśnik klovy —
Viačystaj ściežkaju chadok —
Habluje mysl pad Kisialova,
Majstroŭ smakujučy radok.
Ź dzivosnych knihaŭ — dumki rojem,
Zarok i miortvym i žyvym:
Nia chłopam biełarus — hierojem
Haścincam kročyć viekavym.
Chacia nia skroź hierojstvam sprycien,
Kali pa ščyraści kazać,
Sioj-toj za poliŭku ŭ karycie
Čužacki bič žadzion lizać.
Ad soramu niaścierpnaj rana
Smylić i rana, i ŭnačy —
Dakul ža budzieš, kraj zabrany,
Jarmo na karku vałačy?
Surodzič moj, da błaznaŭ honki,
Sumleńniu atłuścieć nia daj:
Hartaj piakučyja staronki —
Dumu pra Biełaruś čytaj!
I dałakopam nie znarović
Prahnionaj voli božy dar.
Žyvie nam dumańnik-zmahar,
Uparty Hienus-Kalinoviec!
Alaksiej Kaŭka
Plener Drazdoviča
Sioletni plener Jazepa Drazdoviča adbyŭsia ŭzimku. Kala 20 mastakoŭ ź Miensku, Połacku, Viciebsku, Drysy, Hłybokaha, u tym liku Alaksiej Maračkin, Viktar Markaviec, Aleś Rodzin, Uładzimier Sułkoŭski, Aleś Cyrkunoŭ, žyli na turbazie ŭ Padśvilli, što na Hłyboččynie, malavali tamtejšyja krajavidy. 17 sakavika ŭ Połacku adbyłasia vynikovaja vystava. Jaje adkryćcio pieratvaryłasia ŭ sapraŭdny festyval. Svaju dužaść demanstravali vajary z połackaha rycarskaha klubu “Žalezny voŭk”. Potym była muzyčnaja častka — śpiavali Lera Som, Alen, Anton Marhovič – bard z Hłyboččyny, jaki vykanaŭ pieśni na słovy hłybockaha ž paeta Alesia Žyhunova. Naprykancy vystupiŭ Andrej Mielnikaŭ. Hety dynazaŭr śpievu pad hitaru paśpiavaje brać udzieł u mierapryjemstvach uva ŭsich kutkach Biełarusi. Zavieršyŭsia impravizavany festyval performansam na bierazie Dźviny: mastak Aleś Rodzin sa svaim asystentam Mitryčam basanož łazili pa kryhach, peryjadyčna pravalvajučysia ŭ ledzianuju vadu, i rasstaŭlali admysłovyja płaściny, z dapamohaj jakich imknulisia złavić enerhiju raki, što ŭvajšła ŭ pieršuju fazu pavodki.
Vasil Krokva, Połacak
“Pachodnia”
15-hodździe adznačyŭ klub «Pachodnia» — pieršaja ŭ Horadni niezaležnaja supołka moładzi ŭ 80-ch. Na čale «Pachodni», utvoranaj ź inicyjatyvy maładych navukoŭcaŭ Instytutu bijachimii Akademii navuk, stajaŭ viadomy historyk Michaś Tkačoŭ. Paśla jaho źmianiŭ Mikoła Taranda.
B.T.
Časopis “Pravincyja”
23 sakavika ŭ Połackim muzei knihadrukavańnia a 16-j adbudziecca ŭhanaravańnie premijami “Hliniany Viales” — haradzienskaha prazaika i žurnalista Siarhieja Astraŭca (za knihu “Cenzarskija nažnicy”) — i “Važkaja cahlina” — piśmieńnika i vydaŭca Adama Hlobusa. Na imprezie budzie naładžana prezentacyja časopisu “Pravincyja”, jaki ŭ sakaviku pabačyŭ śviet u Biełastoku. Novy peryjodyk pradstavić redaktar Alaksandar Maksimiuk.