Naviny za tydzień
№ 51 (208), 18 — 26 śniežnia 2000 h.
Naviny za tydzień
Biuścik Hitlera
ŭ Śvisłačy
U Śvisłačy adšukali stary pomnik Stalinu dy chočuć pastavić jaho ŭ parku pobač z pomnikami Leninu, Traŭhutu dy Kalinoŭskamu. Chaj by jašče biuścik Hitlera adkapali hetyja biezhałovyja i biessardečnyja “pluralisty”.
Stychijny pratest
u Mahilovie
15 śniežnia 500 pracaŭnikoŭ najbujniejšaha mahiloŭskaha zavodu “Chimvałakno” pierakryli ruch na pr.Puškina: jany nie atrymali zarobku. Ułady paśla hetaha vypłacili rabočym zapazyčanaje nieadkładna.
Strajk pradprymalnikaŭ
Z 1 da 5 studzienia nastupnaha hodu ŭ krainie, najchutčej, projdzie ŭsieahulny strajk pradprymalnikaŭ, jakija handlujuć na rečavych rynkach. Takoje rašeńnie pryniaŭ ichny strajkam. Buduć pratestavać suprać pryniaćcia dekretu ab adzinym padatku z pradprymalnikaŭ, prajekt jakoha padrychtavany. Heta pastavić pradprymalnikaŭ na miažu bankructva, ličać handlary. Kali dakument budzie padpisany, pradprymalniki nie vyklučajuć pačatku biesterminovaj zabastoŭki. Straty ad strajku buduć mizernyja: paśla Novaha hodu abaračeńnie handlu zusim małoje.
Pratestanty pratestujuć
Pratestanty vykazali publičny pratest suprać tranślacyi pa BT 40-chvilinnaj stužki “Ekspansija”, pakazanaj dva razy – 26 kastryčnika i 2 listapada. Ź ichnych słovaŭ, dziaržaŭnyja ŚMI razharnuli kampaniju, jakaja maje na mecie vypracavać admoŭnaje staŭleńnie da pratestanctva. Da pratestu dałučylisia i kiraŭniki šaścioch pratestanckich cerkvaŭ Ukrainy dy Rasiei.
Sprečki vakoł mienskich symbalaŭ
Mienharsaviet abmierkavaŭ himn i hierb stalicy. U hierbie mo budzie źmienienaja hama koleraŭ nieba, pa-inšamu buduć vyhladać abrysy vobłaka, na jakim staić Božaja Maci z aniołami, a taksama ichnyja postaci. Admysłovaja kamisija z 23 varyjantaŭ himnu papiarednie vybrała «Pieśniu pra Miensk» kampazytara Ałoŭnikava. Ale i hetaja da kanca nie zadavalniaje. Miarkujecca abvieścić konkurs na novy himn.
Dzieci zabłukali ŭ lesie
11 śniežnia ŭ lesie la Zadzierci ŭ Žabinkoŭskim rajonie zabłukali dva 11-hadovyja chłapčuki. Ich šukali kala paŭsotni supracoŭnikaŭ MNS, lasnoj achovy, milicyjantaŭ dy viaskoŭcaŭ. A małyja sami vybłukali dy a 5-j ranicy prytupali dachaty.
Biełarusy pradajuć enerhiju
U pieršym paŭhodździ 2001 h. Biełaruś raspačynaje pastaŭki elektraenerhii ŭ Polšču j krainy Zachodniaj Eŭropy ź Biarozaŭskaje DRES. U hod u Zachodniuju Eŭropu budziem ekspartavać da 600 młn. kVt elektraenerhii. Takim čynam, Biarozaŭskaja DRES ułučajecca ŭ polskuju enerhasystemu.
Českija vizy patańnieli
Z 15 śniežnia viza ŭ Čechiju dla hramadzianaŭ Biełarusi budzie kaštavać $10 — amal u 6 razoŭ tańniej, čym raniej. Paśla ŭviadzieńnia vizavaha režymu ŭ Čechiju stała jeździć u 2—3 razy mieniej turystaŭ, tranzytnyja pajezdki taksama amal spynilisia – było zadoraha.
Siadzieć!
Były ałmazaviec Ihnatovič i jahonyja chaŭruśniki ź siłavych strukturaŭ, padazravanyja ŭ zabojstvie Z.Zavadzkaha, a taksama jašče inšych ludziej, nia buduć adpuščanyja pad padpisku ab niavyjeździe, čaho dabivaŭsia ichny advakat, — vyrašyŭ mienski sud.
Aleś Kudrycki pavodle
BiełaPAN, Radyjo Racyja i BARC.
Padarunak za padarunak
Studenty Biełaruskaha ŭniversytetu kultury nie dačakali pałovy stypendyi, zamiest 12 tys. im pad Novy hod vydali tolki 7. Pratačylisia źviestki, što administracyja rychtuje vializarnuju šoŭ-prahramu ŭ Teatry estrady ŭ honar pieradačy jaho ŭładami pad patranat universytetu. Planujecca, što budzie prysutničać i “hałoŭny dabračynca” krainy. A hrošaj, kab jak śled jamu adździačyć, nie staje. Voś i znajšli prosty vychad – sabrali paŭstypendyi ŭ studentaŭ. Francuskija studenty ŭ padobnym vypadku zrabili b u budynku “alma-mater” — akupacyjny strajk, a biełarusy tolki burčać sabie pad nos, “iakija ŭsie kazły”…
N.Dz.
Apazycyju prymajuć
na vysokim uzroŭni
A.Bialacki, V.Viačorka, A.Labiedźka, A.Michalevič, S.Šuškievič naviedali Prahu, dzie mieli spatkańni z uradoŭcami Čechii. Pryniaŭ ich i Vacłaŭ Haveł — havaryli ź im pa-rasiejsku. Našy palityki taksama ŭskłali kvietki da pomnika achviaram Praskaje viasny.
Vydaviectva “Naša Niva” paviedamlaje Vam pra toje, što zaviaršajecca praca nad Słoūnikam Biełaruskaje Movy (klasyčny pravapis). Paśla Novaha hodu słoūnik budzie całkam źmieščany ū Siecivie: http://slounik.hypermart.net
Słoūnik składzieny na padstavie raspracovak Vincuka Viačorki i pastanovaū Praskaj pravapisnaj narady. Redaktar słoūnika — Siarhiej Šupa.
Internetaūskuju publikacyju aūtary razhladajuć jak pilotnuju i zaprašajuć usich da abmierkavańnia: u Słoūniku jašče šmat supiarečnaściaū i niedakładnaściaū. Paśla razhladu ūsich prapanovaū, u 2001 h. planujecca vydańnie vyvieranaj versii Słoūnika ū knižnym farmacie.