Barysaŭ – stalica niezaležnaha futbołu

Barysaŭ – stalica niezaležnaha futbołu

21-23 lipienia ŭ Barysavie, na bierazie raki Bieraziny, jakaja padzialaje horad na dźvie častki, adbyŭsia finalny futbolny turnir Kubak «Niezaležnaści».

Za niekalki dzion da futbolnaha śviata niaščadna palivaŭ doždž, ale jakraz napiaredadni spabornictvaŭ ustalavałasia fajnaje nadvorje.

U pieršy dzień na aznačanaje miesca pačali źbiracca zaprošanyja kamandy ź Bieraścia, Viciebsku, Maładečna, Žodzina. Miensk i Barysaŭ vystavili pa dźvie kamandy. U futboł nie hulali – tolki astaloŭvalisia, znajomilisia dy rychtavalisia da «siečy». Słuchali śpievy viadomaha biełaruskaha barda Andreja Mielnikava i vieršy miascovaj paetki Aleny Majeŭskaj.

22-ha lipienia adbyłosia ŭračystaje adkryćcio. A 9-j hadzinie kamandy pašychtavalisia. Honar uźniaćcia nacyjanalnaha ściahu vypaŭ «starejšamu ŭdzielniku turniru», a taksama i adnamu z arhanizataraŭ, Anatolu Askierku. Praviły turniru byli abvieščanyja kiraŭnikom spartova-turystyčnaha klubu «Vołat», Źmitrom Barodkam: kamandy padzialili na dźvie hrupy, u kožnaj pa čatyry, jakija hulali «kožny z kožnym». U pierapynkach pamiž dvanaccaciu hulniami, što byli zhulanyja ŭ hety dzień, chłopcy mieli mahčymaść achałodzić svoj «pył», admakajučy ŭ race.

Pa vynikach hulniaŭ u paŭfinał, jaki adbyŭsia na apošni dzień, trapili nastupnyja kamandy: «Supolnaść» (Miensk) i «Hrunvald» (Maładečna), a taksama dźvie barysaŭskija kamandy «Barysaŭ-1» i «Vołat». Mienčuki biez usialakich ciažkaściaŭ adoleli «rycaraŭ» – 9:1, a «Vołat» u dadatkovy čas zdoleŭ vyrvać pieramohu ź likam 3:2. Takim čynam, u finał trapili dva hrandy turniru, mienčuki j barysaŭcy.

Finał byŭ vielmi napružany. Vakoł pola zhurtavalisia šmatlikija zaŭziatary, emacyjna padtrymlivajučy abiedźvie kamandy. Fartuna akazałasia na baku barysaŭcaŭ, jakija atrymali pieramohu ź likam 2:1.

Pieramožca atrymaŭ vializny kryštalovy kubak, jakomu mahli b pazajzdrościć i ŭładalniki Kubku Biełarusi. Naviersie jaho kryštalovy futbolny miačyk, a na samim kubku hraviroŭka «Niezaležnaść» (u dalejšym miarkujecca zrabić hety kubak pierachodnym). Akramia hałoŭnaha pryzu, pieramožcy atrymali videakasety ź «biełaruskamoŭnym» «Advažnym sercam», druhija dźvie kamandy – aŭdyjakasety ź biełaruskimi zapisami, a taksama ŭsie try kamandy atrymali dyplomy. A treciaje miesca zastałosia za maładačancami, jakija mieli najbolšuju hrupaj padtrymki.

Lepšym bambardyram byŭ pryznany samy małady, trynaccacihadovy Źmicier Uljanovič; jaho technika i naporystaść zachaplali ŭsich i, jak vynik, jon zabiŭ 8 hałoŭ. Hulali taksama j dzieci viadomych palitykaŭ: Franak Viačorka dy Siaržuk Barščeŭski. Druhuju mienskuju kamandu «Zialonyja čerci» ŭznačalvaŭ Alaksiej Šydłoŭski.

Ale ž samuju vysokuju ŭznaharodu — udziačnaść udzielnikaŭ — atrymali arhanizatary. Na zakryćci jany abvieścili, što «patentujuć hetaje mierapryjemstva», a taksama čakajuć usich zacikaŭlenych na nastupny hod u Barysaŭ.

Vołat