Zamiest palityki — dysydenctva

Zamiest palityki — dysydenctva

Padpisańnie damovy ab utvareńni sajuzu z Rasiejaj u Miensku adznačyli stychijnymi pratestami. 75 čałaviek zranku ŭ sieradu adhuknulisia, pierakryŭšy praspekt Skaryny žyvym łancuhom, trymajučy lozunhi “Ruki preč ad Biełarusi!”, “Nie — sajuzu”. Prastajać atrymałasia chvilinaŭ 10, paśla čaho padjechała milicyja dy adciaśniła pratestantaŭ. Tym nia mienš, ludzi nie zdalisia j pryznačyli praciah akcyi na piatuju viečara.

Praciah akcyi byŭ u značnaj miery sarvany z-za zatrymańnia namieśnika staršyni BNF Viačasłava Siŭčyka. Tym nia mienš, a 17.25 praspekt znoŭ pierakryli, ale mienš čym na paŭchviliny. Milicyja padrychtavałasia da mahčymaha pratestu, i z dvaroŭ ument vyskačyli para dziasiatkaŭ milicyjantaŭ.

Tady demanstranty mini-kalonaj rušyli ŭ bok Kastryčnickaj płoščy, ale la cyrku šlach im pieraharadzili ŭzbrojenyja ščytami dy dubinkami amonaŭcy. Kalona zrabiła jašče adnu sprobu prabicca da rezydencyi ŭ rajonie restaranu “Ŭzbekistan”, ale nia zdoleła. 12 čałaviek, ź ich šeść niepaŭnaletnich, zatrymali. Siarod zatrymanych — paet Słavamir Adamovič i deputat Ščukin. Sudy nad “niaskoranymi” projduć u Savieckim sudzie ŭ paniadziełak-aŭtorak.

Škada tolki, što palityki, zamiest taho, kab zładzić bujnuju i arhanizavanuju akcyju, damoviŭšysia papiarednie, prabiŭšysia ŭ hazety i raskidaŭšy ŭ horadzie ŭlotki, achviarujuć saboj na akcyjach adčaju.

Barys Tumar, Alaksiej Šydłoŭski