Novy raŭnd suprać hidry?
Skandał pad dacham "Biełnaftachimu"
Ci laža na zatrymanaha čynoŭnika adkaznaść i za ciažkija prablemy haliny?
Supracoŭniki KDB zatrymali ŭ Miensku staršyniu dziaržaŭnaha pradpryjemstva "Biełnaftachim" Alaksandra Baroŭskaha. Sa słoŭ hienprakurora Mikłaševiča, zatrymany padazrajecca va złoŭžyvańni słužbovym stanoviščam i kradziažy. U jaho kanfiskavany bujnyja sumy hrošaj.
Adrazu padkreślim prezumpcyju nievinavataści. Razam z tym, nia vyklučana, što pačnie raskručvacca hučnaja karupcyjnaja sprava.
Sprahnazujem mahčymy pijaraŭski fon hetaha siužetu.
Varta čakać, što apazycyja čarhovy raz zakinie aficyjnamu kiraŭniku nia nadta plonnaje zmahańnie z karupcyjaj ciaham amal užo 13 hadoŭ kiravańnia. I toje, što pedalavańnie adpaviednych lozunhaŭ, maŭlaŭ, maje na mecie adciahnuć uvahu elektaratu ad narastańnia ekanamičnych ciažkaściaŭ, skasavańnia lhotaŭ dy inšych niazručnych dla viarchoŭ pytańniaŭ. Razam z tym, mahčyma, apanenty ułady adznačać nie biaź źjedlivaści, što KDB sapraŭdy lepiej skancentravacca na ekanamičnaj złačynnaści, čym jak pieraśledavać dziaciej z "Maładoha frontu".
Tym časam chto-kolviek u kuluarach razvažaje, ci ŭtrymajecca vysokaje načalstva ad spakusy śpisać na zatrymanaha čynoŭnika adkaznaść za ciažkija prablemy ajčynnaha naftachimu.
Pakul sud dy sprava, ja pahutaryŭ z ekanamičnym ekspertam Tacianaj Manionak, znaŭcaj naftavaha pytańnia. Na jejnuju dumku, naŭrad ci možna kazać, što kiraŭnictva "Biełnaftachimu" u prafesijnaj sfery zrabiła niejkija systemnyja pamyłki. Prablemy haliny źviazanyja najpierš z novymi ŭmovami pastavak enerhanośbitaŭ, nakinutymi Rasiejaj. Možna skazać, što kancern staŭ u niejkaj stupieni zakładnikam naftavaj vajny.
Dadamo: i administracyjnaj ekanomiki. Čynoŭniki "Biełnaftachimu", ź jakimi nia nadta railisia ŭ zapale supraćstajańnia z Maskvoju, musili moŭčki prymać ekzatyčnyja praviły hulni kštałtu — pamiatajecie? — spantanna ŭviedzienaha Mienskam i nieŭzabavie skasavanaha myta na prapampoŭku rasiejskaj nafty. Usio heta, sami razumiejecie, stabilnaści halinie nie dadavała...
U miežach administracyjnaj ekanomiki, ličyć Taciana Manionak, luby novy kiraŭnik kancernu naŭrad ci skočyć vyšej za hałavu.
P.S. Tym časam BIEŁTA paviedamiła: uzbudžanaja kryminalnaja sprava suprać adnaho ź kiraŭnikoŭ i šerahu supracoŭnikaŭ nacyjanalnaha aeraportu "Miensk".