Polski špijon vypuściŭ knihu pra Biełaruś

Aŭtar piša pra biełaruski KDB, FSB i... švieda-špijona ź vioski Miadviedki.

Aficer polskaj raźviedki pad pseŭdnimam Vincent V. Siavierski (Vincent V. Severski) napisaŭ špijonskuju apovieść, padziei ŭ jakoj razhortvajucca ŭ łukašenkaŭskaj Biełarusi i — siurpryz — u Švecyi.

«Nielehały» («Nielegalni») — heta detektyŭnaja apovieść pra tajamnicy pracy špijonaŭ-nielehałaŭ. Kniha vyjšła letaś i stała hitom pa prodažy.

Instytut nacyjanalnaj pamiaci Polščy atrymoŭvaje infarmacyju pra tajamničuju skryniu, zakapanuju ŭ 1940-yja hady ŭ ruinach Bieraściejskaj krepaści. U joj schavanyja sensacyjnyja davajennyja archivy NKVD pra dziejnaść savieckaj raźviedki i jaje špijonaŭ u mižvajennaj Polščy. Za skryniaj pačynajuć palavać Varšava j Maskva. As polskaj raźviedki Konrad Volski j jaho najlepšyja ahienty rušać u pahoniu za histaryčnym skarbam. U dadatak švedzkaja raźviedka prosić palakaŭ dapamahčy ŭ nazirańni za 80-hadovym Chansam Jorhiensam — datčaninam sa švedzkim pašpartam, jaki akazvajecca supieršpijonam rasiejskich specsłužbaŭ i da taho ž biełarusam z-pad Horadni. Jorhiens bolšaść žyćcia pražyŭ u Skandynavii j pałaje lutaj nianaviściu da palakaŭ za zabojstva ŭ časie vajny jaho siamji j žycharoŭ jahonaj rodnaj vioski Miadviedki. Jaho historyja ciesna źviazanaja z akaličnaściami archivu NKVD.

Pačynajecca honka na apieradžeńnie. Polskija j rasiejskija ahienty jeduć u Biełaruś. Tam nie abychodzicca biez łukašenkaŭskaha KDB. Adnak vobraz biełaruskich specsłužbaŭ u knizie Siavierskaha naŭradci spadabaŭsia b mienskim čekistam. Kamitet dziaržbiaśpieki pakazany naskroź karumpavanaj strukturaj, paviazanaj ź biznesam i kantrabandystami, a sami čekisty — amatary čarki j rasiejskija ahienty. Ale navat kapitan Vasil Krupa, jaki źlivaje infu maskvičam, maryć pra Biełaruś biez Łukašenki j ličyć siabie biełaruskim patryjotam.

Usie hetyja, na pieršy pohlad, roznyja historyi j ludzi złučajucca ŭ zajmalny siužet knihi, jakaja naličvaje bolš za 800 staronak.

«Supadzieńnie apisanych u knizie padziej z sapraŭdnymi vypadkovaje, ale nie zaŭsiody» — piša na pačatku knihi Vincent Siavierski. Aŭtar adpracavaŭ u specsłužbach 27 hadoŭ. Za hety čas jon udzielničaŭ u 140 misijach u amal 50-ci krainach pad vydumanym imiem. Zajmaŭ kiraŭničuju pasadu ŭ Ahienctvie vyviedki i ŭ 2007 hodzie vyjšaŭ u adstaŭku. Maje šmat uradavych uznaharodaŭ. Viadoma, što i Barak Abama ŭznaharodziŭ jaho niadaŭna ordenam «Lehijonu pašany».

Interviju ź Vincentam Siavierskim źjavicca na Polskim radyjo ŭ bližejšyja dni.

Kamientary da artykuła