Miniust pradpisaŭ Partyi BNF «vypravicca»

Ministerstva justycyi pradpisała Partyi BNF ustaranić parušeńni zakanadaŭstva i statuta partyi.

Jak paviedamlaje pres-słužba Partyi BNF, da ich pastupiŭ list Miniusta pad nazvaj «Ab parušeńniach patrabavańniaŭ zakanadaŭstva i statuta» za podpisam namieśnika ministra justycyi Ihara Tušynskaha. U im pieraličvajucca parušeńni, jakija, na dumku Miniusta, byli dapuščany partyjaj u arhanizacyi spravavodstva, uliku členaŭ, afarmleńnia błankaŭ dla aficyjnaj pierapiski, vykarystańnia partyjnaj simvoliki. Miniust adznačaje, što hetyja parušeńni nosiać hruby charaktar i mohuć stać padstavaj dla vyniasieńnia Partyi BNF piśmovaha papiaredžańnia.

U liście taksama prapanujecca na praciahu miesiaca ŭstaranić niedachopy ŭ dziejnaści, pryniaŭšy adpaviednyja rašeńni partyjnych orhanaŭ.

Kiraŭnik Partyi BNF Alaksiej Janukievič źviazvaje ŭvahu Miniusta z aktyŭnaściu, jakuju razharnuli rehijanalnyja struktury partyi ŭ ramkach parłamienckaj vybarčaj kampanii.

«Biezumoŭna, uvaha kantrolnych orhanaŭ vyklikana tym, što partyja ŭ chodzie vybarčaj kampanii aktyvizavała svaju dziejnaść. My ŭ adpaviednaści z patrabavańniami zakanadaŭstva paviedamili ŭ Ministerstva justycyi ab sklikańni pazačarhovaha źjezda Partyi BNF pa vyłučeńni kandydataŭ u deputaty, jaki projdzie 4 žniŭnia. I adrazu ž paśla hetaha byŭ atrymany hety list z zaŭvahami da błankaŭ i ŭliku členaŭ. Nie vyklučana, što takim čynam moža rychtavacca hleba dla taho, kab pastavić pad sumnieńnie partyjnaje vyłučeńnie našych kandydataŭ», — skazaŭ Janukievič.

Jon adznačyŭ, što pa bolšaści sa sprečnych zaŭvah Miniustu raniej užo byli dadzieny tłumačeńni.

«My prykładziem usie namahańni da taho, kab nie dać padstaŭ asprečvać rašeńni źjezda pa vyłučeńni kandydataŭ u deputaty», — zajaviŭ Janukievič.

Kamientary da artykuła