Labiedźka aštrafavany na 500 tys. za hrošy, pazyčanyja ŭ baćki
Lidar Abjadnanaj hramadzianskaj partyi Anatol Labiedźka aštrafavany inśpiekcyjaj Ministerstva pa padatkach i zborach pa Centralnym rajonie Minska na 500 tysiač rubloŭ.
Pavodle słoŭ Labiedźki, jaho i jaho svajakoŭ zaraz praviaraje padatkovaja inśpiekcyja. «Spačatku pravieryli maje dachody za 18 hadoŭ. Užo tady mianie sprabavali aštrafavać. Adnak tady rašeńnie ab nakładzienym na mianie štrafie ja abskardziŭ u padatkovaj inśpiekcyi horada, i štraf źniali, a administracyjnuju spravu nakiravali na dapracoŭku. Zaraz pravodziać pravierku za try hady. 4 červienia mianie aznajomili z pastanovaj ab administracyjnaj spravie i ŭžo viečaram vynieśli rašeńnie ab štrafie», — skazaŭ jon.
Pryčynaj dla štrafu stała toje, što Labiedźka dla kupli aŭtamabila pazyčyŭ hrošy ŭ baćki, ale nie aformiŭ heta jurydyčna jak pazyku i nie ŭkazaŭ pra heta ŭ dekłaracyi.Jamu taksama pastavili ŭ vinu toje, što jon ukazaŭ niepraŭdzivuju sumu pryvatyzacyi ŭ siaredzinie
«Ja abaviazkova abskardžu hetaje rašeńnie ŭ padatkovaj inśpiekcyi horada. Aprača taho, ja maju namier źviarnucca da ministra pa padatkach i zborach ź listom, kab usie ministry i čynoŭniki prajšli takuju ž kompleksnuju pravierku, jak i ja. Ja, u adroźnieńnie ad ich, nie rasparadžajusia dziaržaŭnymi srodkami, majomaściu, ziamloj, i ja chacieŭ by, kab padatkovaja pravieryła dziaržčynoŭnikaŭ na pradmiet dachodaŭ. Voś dzie mohuć adkrycca samyja dziŭnyja fakty», — miarkuje Labiedźka.