Łukašenka: U mianie aviečki, i my ich užo dva razy stryhli
«Kab maje ludzi, maje rabočyja, moj narod mieli mahčymaść pracavać».
«Ja ničoha nie bajusia. Mnie bajacca niama čaho, ja čałaviek rašučy, i hublać mnie ŭ pryncypie niama čaho», — zajaviŭ Łukašenka 21 krasavika ŭ Minsku, adkazvajučy padčas subotnika na pytańnie žurnalistaŭ, jak jon stavicca da mierkavańnia, što kiraŭnik dziaržavy patrabuje ad urada vyrašeńnia pytańniaŭ na prablemnych pradpryjemstvach, tamu što baicca pratestaŭ rabočych.
«Tam, dzie jość słova „baicca“, kamientavać niama čaho», — cytuje Łukašenku dziaržaŭnaje infarmahienctva BiełTA.
«Kali ja čaho i bajusia, to tolki mierkavańnia maich ludziej, majho naroda. Heta maje vybarščyki, ja ich mierkavańnie caniu i pavažaju. Tamu kali rabočy čałaviek havoryć, što štości nie tak, ja na heta reahuju.
Jak ja reahuju, vy viedajecie»,— skazaŭ aficyjny biełaruski lidar.
Jon zajaviŭ, što «prablemnyja pradpryjemstvy» buduć refarmavanyja. Łukašenka nahadaŭ, što niadaŭna pryniaŭ rašeńnie stvaryć u krainie novuju halinu — aviečkahadoŭlu. Tak, płanujecca pabudavać novy kamvolny kambinat i vyrablać u Biełarusi vyraby z voŭny.
«Ja heta praekśpierymientavaŭ u siabie na fiermie. U mianie dziasiatak aviečak.My ich užo dva razy stryhli — vialikaja kolkaść voŭny. Samyja lepšyja aviečki ŭ śviecie, i jany vydatna siabie adčuvajuć. Ciapier zrobim heta pa ŭsioj krainie», — skazaŭ Łukašenka.
Jon taksama paviedamiŭ, što płanujecca refarmavać i motaviełazavod. «Ja nikoli ŭ žyćci nie addam i nie straču hetu marku. My zrobim samaje sučasnaje pradpryjemstva. Heta taksama vialiki strach, kab nie stracić hety brend i kab maje ludzi, maje rabočyja, moj narod mieli mahčymaść pracavać, zarablać i karmić svaich dziaciej», — zajaviŭ jon