Kiroŭca «Kia», jaki kinuŭ siabroŭku, što zahinuła, na miescy avaryi, aryštavany
Treciakurśnik BDU padstryhsia i siadzieŭ udoma ŭ Navapołacku.
Nahadajem, hety aŭtamabil u noč z 4 na 5 krasavika ŭrezaŭsia ŭ słup na pr. Niezaležnaści ŭ Minsku. U vyniku avaryi zahinuła maładaja pasažyrka. Kiroŭca źbieh. U vyšuk byŭ abvieščany treciakurśnik BDU Arciom P. (1991 h.n.). U piatnicu jaho ŭdałosia zatrymać, a siońnia pryniataje rašeńnie pra jaho aryšt, paviedamiŭ načalnik adździeła prakuratury Minska Jahor Darožka.
Avaryja adbyłasia kala 2:15 nočy. Aŭtamabil ruchaŭsia z boku MKAD u napramku vuł. Kalinoŭskaha. Kala Maskoŭskich mohiłak jon urezaŭsia ŭ słup. Pasažyrka 1992 h.n. zahinuła. Ratavalniki tolki z dapamohaj śpiecinstrumientu zmahli dastać cieła dziaŭčyny (jano znachodziłasia na piarednim siadzieńni).
Pošuki kiroŭcy praciahvalisia paŭtara tydnia. Pavodle infarmacyi onliner.by, čamadan i sumki, jakija znachodzilisia ŭ aŭtamabili, naležać jamu. Jon pierabiraŭsia z adnaho zdymnaha žylla na inšaje. Adrazu paśla avaryi jaho amal atrymałasia zatrymać. U miescy, kudy jon adpraviŭsia adrazu paśla DTZ, pabyvali apieratyŭniki, adnak tam jaho ŭžo nie było.
U vyniku Arciom P. byŭ zatrymany ŭ minułuju piatnicu, u 16:05, u Navapołacku, dzie jon i žyvie. Pa słovach supracoŭnikaŭ prakuratury, małady čałaviek pastryhsia. Paznać jaho pa fota było prablematyčna.
— Jon nie admaŭlaje, što znachodziŭsia za rulom Kia ŭ momant avaryi, — zaŭvažyŭ Jahor Darožka. — Na pytańnie, čamu chavaŭsia, adkazvaje: byŭ u šokavym stanie. Ciapier vyśviatlajecca, pry jakich abstavinach zdaryłasia DTZ. Da suda padazravany budzie znachodzicca pad vartaj.