Harcujeŭ pryznačany mastackim kiraŭnikom Teatra biełaruskaj dramaturhii

Ministerstva kultury ŭzhadniła pryznačeńnie mastackim kiraŭnikom Respublikanskaha teatra biełaruskaha dramaturhii (RTBD) Alaksandra Harcujeva.

Jak paviedamlaje pres-słužba Minkulta, kandydaturu Harcujeva na pasadu mastackaha kiraŭnika teatra vyłučyŭ viadomy akcior Ihar Sihaŭ, jaki ŭ kancy minułaha tydnia, 23 sakavika, zaniaŭ pasadu dyrektara teatra.

Alaksandr Harcujeŭ paśla zakančeńnia ŭ 1980 hodzie akciorskaha adździaleńnia Biełaruskaha dziaržaŭnaha teatralna-mastackaha instytuta pracavaŭ akcioram u Nacyjanalnym akademičnym teatry imia Janki Kupały.

U 1994 hodzie na scenie RTBD pastaviŭ svoj pieršy śpiektakl — «Čorny kvadrat». U 2000 hodzie Harcujeŭ skončyŭ režysiorskaje adździaleńnie Rasijskaj akademii teatralnaha mastactva i prajšoŭ stažyroŭku pad kiraŭnictvam viadomaha režysiora Leanida Chiejfieca. Z 2000 hoda pracavaŭ režysioram Kupałaŭskaha teatra.

Harcujeŭ źjaŭlajecca režysioram mnohich śpiektaklaŭ, siarod jakich — «Ivona, pryncesa Burhundskaja» (Vitold Hambrovič), «Dzieci Vaniušyna» (Siarhiej Najdzionaŭ), «Cham» (Eliza Ažeška), «Nie moj» (Aleś Adamovič), «Ludzi na bałocie» (Ivan Mielež).

Alaksandr Harcujeŭ taksama vykładaje ŭ Biełaruskaj dziaržaŭnaj akademii mastactvaŭ, dzie ŭ 2008 hodzie vypuściŭ kurs maładych režysioraŭ dramatyčnaha teatra.

Kamientary da artykuła