Z homielskaha IČU vyzvaleny Dźmitryj Šaŭčenka

4 studzienia adbyŭ piać sutak pakarańnia homielski lidar internet-supołki «Revalucyja praz sacyjalnyja sietki» Dźmitryj Šaŭčenka.

Paśla vyzvaleńnia aryštavany raskazaŭ pra abstaviny zatrymańnia 30 śniežnia. «Ja vyjšaŭ sa svajoj kvatery i nakiravaŭsia na prypynak. Nie dajšoŭšy 100 mietraŭ da prypynku, byŭ zatrymany śpiecnazam. Dakładna pamiataju, što adnaho ź milicyjanieraŭ zvali Juryj Biarozkin (darečy, hety milicyjanier nie pieršy raz zatrymlivaje aktyvistaŭ, a zatym iłžeśviedčyć suprać ich u sudzie — zaŭvaha Red.). Mianie pryvieźli ŭ adździeł i tam padkinuli čorna-biełyja ŭlotki, padobnyja na tyja, jakija byli raspaŭsiudžany ŭ horadzie supołkaj „RČSS“. Navošta heta było rabić — ja nie razumieju, tym bolš u mianie z saboj byli kalarovyja ŭlotki, bolš za 1,8 tysiačy asobnikaŭ», — adznačyŭ Dźmitryj Šaŭčenka.

Sudździa Anatol Sotnikaŭ pakaraŭ jaho aryštam za parušeńnie paradku praviadzieńnia masavaha mierapryjemstva (23.34 KaAP). Pryčym hety sudździa ŭžo treci raz sudzić aktyvista i treci raz karaje jaho «sutkami». Na sudovaje pasiedžańnie źjavilisia i śviedki, pa słovach Dźmitryja, «niejkija peteŭšniki», jakija śćviardžali, što mienavita hety małady čałaviek davaŭ im ulotki i zaprašaŭ sustreć Novy hod apładysmientami.

U IČU Šaŭčenka adbyvaŭ pakarańnie ŭ adzinočnaj kamiery. Darečy, heta homielskaje nou-chau: apošnija miesiacy ŭsich apazicyjanieraŭ sadziać mienavita ŭ adzinočnyja kamiery, napeŭna, kab nie «ŭpłyvali» na «sacyjalna-blizkich». «Novy Hod ničym nie adroźnivaŭsia ad inšych dzion tam, praŭda, jak zaŭsiody ŭ izalatarach pa subotach, davali małako. Ja asabliva nie pakryŭdziŭsia, što sustrakaju Novy hod u turmie, tamu što nie prydaju hetamu śviatu vialikaj uvahi», — zaŭvažyŭ Šaŭčenka.

Rašeńnie sudu jon budzie abskardžvać, chacia sumniajecca, što heta daść niejki plon.

Kamientary da artykuła