Łukašenka: U niekatorych vypadkach dyktatura — najmienšaje zło
Heta vynikaje z frahmienta intervju kiraŭnika biełaruskaj dziaržavy hałoŭnamu redaktaru radyjostancyi «Russkaja słužba novostiej» (RSN) Siarhieju Darenku. Hutarka adbyłasia ŭ Minsku 13 śniežnia i tranślavałasia ŭ efiry 16 śniežnia.
Darenka skazaŭ: «Atrymlivajecca, što patrebna dyktatura ŭsiudy, dzie jość narod, schilny da archaizacyi. Dyktatar, jaki trymaje masy, jakija ŭmoŭna možna nazvać bydłam, ažyćciaŭlaje dyktaturu. Ale ž jana rana ci pozna złomicca».
«Davajcie voźmiem, kali hety dyktatar Kadafi, Chusejn, Łukašenka… (replika Darenki: „Vy i siabie adnieśli?“ Łukašenka: „Heta jany tam adnosiać, i ja navat asabliva nie ździŭlajusia“),Achmadyniežad — mienšaje zło, čym toje, jakoje moža być, a heta lohka praličyć. Budzie isłamizacyja», — ličyć Łukašenka. «Ja kažu pra jaŭrejaŭ. Ich śpiecsłužby daŭno skazali: nie čapajcie Jehipiet. Tak, nam ź im ciažka, ale budzie horš. Nie čapajcie Asada. Tak, jon trymaje nas u napružańni, ale hety čałaviek zaścierahaje nas ad vajny ź Siryjaj.
Amierykancy heta nie pasłuchali. Dyk navošta ž nam siońnia skidvać hetaha archaičnaha čałavieka, lidara dla taho, kab zrabić jašče horš?»— skazaŭ biełaruski prezident. Pavodle jaho mierkavańnia, heta robiać «biezrazvažnyja ludzi». «Vy pravilna skazali, što heta kaniečna. Skažam, što kaniečna, choć vy heta nie možacie mnie dakazać», — zajaviŭ kiraŭnik dziaržavy.
Pavodle mierkavańnia Darenki, u niekatorych krainach ZŠA stvarajuć «kantralavany chaos» z metaj nie kantralavać terytoryi pry dapamozie vojskaŭ, kab nie hublać asabovy skład. I pryvioŭ prykład Livii jak adnoj z «kropak chaosu». Łukašenka ličyć, što «heta ŭ ich nie atrymajecca». «Jany tam biazdumna, biez usiakich na toje padstaŭ stvaryli nie prosta liniju, a ceły pojas. U Jehipcie isłamisty pieramahli. Chiba palepšyłasia situacyja? Heta była kvitniejučaja kraina», — adznačyŭ Łukašenka.