U Kazachstanie śviatkavańnie Dnia Niezaležnaści skončyłasia masavymi biesparadkami
Abnoŭlena.
Pa aficyjnaj infarmacyi zahinuli dziesiać čałaviek.
Skrynšot ź videapartała Stan.tv.
Skrynšot ź videapartała Stan.tv.
«Pa papiarednich dadzienych, u vyniku masavych biesparadkaŭ u Žanaazienie zahinuli 10 čałaviek, jość paranienyja, u tym liku siarod supracoŭnikaŭ palicyi», — paviedamiŭ hienieralny prakuror Kazachstana Aschat Daułbajev na bryfinhu ŭviečary ŭ piatnicu, 16 śniežnia, u Astanie. Jon admaŭlaje, što siły biaśpieki adkryli ahoń pa ŭdzielnikach pratestu, piša kazachskaje radyjo «Svaboda».
***
16 śniežnia Kazachstan adznačaje 20-ju hadavinu atrymańnia niezaležnaści. Śviatkavańni ŭ horadzie Žanaazenie Manhistauskaj vobłaści skončylisia masavymi biesparadkami. Ź miesca padziej pastupaje supiarečlivaja infarmacyja.
Pavodle kazachskaj słužby radyjo «Svaboda», hienieralnaja prakuratura Kazachstana paćvierdziła infarmacyju pra sutyčki z palicyjaj. Pavodle prakuratury. Chulihany sarvali śviatočnyja mierapryjemstvy ŭ centry horada. Razburyli scenu i handlovyja jurty, źbili dvuch palicyjantaŭ. Raspačataja kryminalnaja sprava.
Miascovaja hazieta «Aktau-Łada» pryvodzić słovy adnaho z pradstaŭnikoŭ haradskich uładaŭ pra toje, što na płošču «ŭvarvaŭsia aźviareły natoŭp z abrezkami trubaŭ». U hety momant na płoščy nibyta byli dzieci z transparantami i nacyjanalnymi ściahami. Napadniki padpalili śviatočnuju jełku i aŭtobus.
U svaju čarhu, apazicyjny sajt Socialismkz.info paviedamlaje, što siońnia ŭ Žanaazenie ŭnutranyja vojski rasstralali akcyju pratestu zvolnienych naftavikoŭ, jakaja praciahvajecca ŭžo siomy miesiac. Pavodle sajta, na akcyju vyjšła kala 5000 čałaviek. Nibyta ŭ niejki momant palicyja nakiravała ŭ natoŭp słužbovy aŭtamabil, čym spravakavała ludziej na adpaviednuju reakcyju. U chutkim časie na płoščy źjavilisia ŭnutranyja vojski i pačali rasstrelvać natoŭp. Paviedamlajecca pra dziasiatki zabitych i sotni paranienych.