U Mahilovie adkryjecca filijał opiernaha teatra
13 śniežnia baletnym śpiektaklem «Žyzel» u Mahilovie adkryjecca filijał Nacyjanalnaha akademičnaha Vialikaha teatra opiery i baleta.Ab hetym paviedamiŭ hienieralny dyrektar teatra Uładzimir Hrydziuška 12 śniežnia na
Pavodle jaho słoŭ, havorka idzie ab pastajannaj asnovie dla hastrolnaj dziejnaści ŭ Mahilovie. «Filijał — rabočaja nazva. My nie stvarajem tam trupu, nie ŭtvarajem jurydyčnuju asobu», — skazaŭ Hrydziuška. Na pieršym časie śpiektakli Vialikaha teatra płanujecca pakazvać raz na miesiac, a ŭ nastupnym — dva razy na miesiac: balet i opieru.
Dahavor ab arhanizacyi paŭnacennych rehularnych hastrolaŭ pamiž kiraŭnictvam teatra i Mahiloŭskaha abłvykankama byŭ padpisany miesiac tamu. U najbližejšaj budučyni padobnyja filijały Vialikaha teatra płanujecca stvaryć u Homieli, Połacku i Niaśvižy. Nadalej pastajannyja hastroli Vialikaha teatra płanujecca arhanizoŭvać i ŭ inšych bujnych haradach Biełarusi.
Pavodle słoŭ Hrydziuški, adkryćcio filijałaŭ Vialikaha teatra ŭ rehijonach stała mahčymym dziakujučy pašyreńniu trupy baleta i stvareńniu trupy stažoraŭ. Heta taksama dazvalaje davać paŭnacennyja śpiektakli baleta ŭ Minsku ŭ toj čas, kali asnoŭny skład baleta znachodzicca na hastrolach za miažoj.
Jak adznačyŭ dyrektar, 13 śniežnia baletnaja trupa teatra vyjazdžaje ŭ vialiki hastrolny tur pa najbujniejšych haradach Aŭstryi i Hiermanii. Biełaruskija artysty pakažuć dva śpiektakli: «Lebiadzinaje voziera» i «Ščaŭkunčyk». U listapadzie artysty baleta paśpiachova hastralavali pa Ispanii, što nie pieraškodziła pakazam śpiektaklaŭ u Minsku, dadaŭ jon.