Za miažu na aŭto ciapier  — raz u vosiem dzion

Miery pa abmiežavańni vyvazu paliva robiacca jašče bolš žorstkimi ŭ Biełarusi.

U Biełarusi stanuć bolš žorstkimi zachady pa abmiežavańni vyvazu paliva, paviedamiŭ siońnia na sustrečy z pracoŭnym kalektyvam AAT «MAZ» prem'jer-ministr Michaił Miaśnikovič.

«Jak by heta było niepapularna,

ja padpisaŭ učora pastanovu, kab nie raz u piać, a raz u vosiem dzion vyjazdžać za miažu, za vyklučeńniem tych, chto jedzie ŭ kamandziroŭku, vykonvaje svaje funkcyjanalnyja abaviazki abo pracuje pa damovie najmu»,

Pastanova pakul nie vyjšła, zaraz adpracoŭvajucca miechanizmy dla jaje ŭviadzieńnia, udakładniŭ prem'jer-ministr. Kiraŭnik urada nahadaŭ, što z-za dysparytetu cen mižnarodnyja aŭtapieravozčyki aktyŭna pačali vyvozić dyzpaliva ź Biełarusi ŭ inšyja krainy dla pieraprodažu. «Košt paliva ŭ nas adroźnivajecca prykładna na $1,5 za litr u paraŭnańni z Polščaj, Litvoj, Łatvijaj, — nahadaŭ jon. — Kali jomistaść baka składaje adnu tonu, a to i bolš, pieravozčyk maje prybytak kala $1,5 tys.».

Z-za situacyi, jakaja skłałasia, rezka ŭzrasła realizacyja dyzpaliva ŭ Biełarusi. «U vyniku našy naftazavody majuć admoŭny bałans z-za taho, što nie mohuć vyručyć nieabchodnuju kolkaść rubloŭ, kab ich skanviertavać i kupić novyja partyi nafty», — kanstatavaŭ kiraŭnik urada.

Jon taksama adznačyŭ, što pieraprodažam paliva zajmajucca i kiroŭcy lehkavych aŭtamabilaŭ. «Mnohija pieratvaryli heta ŭ vyhadny biźnies, adnak jon prynosić škodu dla ekanomiki i jaho treba spyniać», — reziumavaŭ Michaił Miaśnikovič.

Kamientary da artykuła