«Hałasy ŭ Sucharavie nichto tołkam nie ličyŭ»
Aleś Łahviniec dy Karen Akopaŭ balatavalisia ŭ 27‑j Sucharaŭskaj vybarčaj akruzie. Ichnymi vysiłkami było arhanizavanaje niezaležnaje nazirańnie za vybarami, jakoje achapiła ŭsie 11 vybarčych učastkaŭ. Naziralniki adznačyli šmatlikija parušeńni vybarčaha zakanadaŭstva.
Niezaležnyja kandydaty Aleś Łahviniec dy Karen Akopaŭ balatavalisia ŭ 27‑j Sucharaŭskaj vybarčaj akruzie. Ichnymi vysiłkami było arhanizavanaje niezaležnaje nazirańnie za vybarami, jakoje achapiła ŭsie 11 vybarčych učastkaŭ. Naziralniki, siarod jakich byŭ i sp. Akopaŭ, adznačali šmatlikija parušeńni vybarčaha zakanadaŭstva. Voś tolki najbolš krasamoŭnyja fakty, zafiksavanyja padčas miascovych vybaraŭ u 27‑j akruzie.
Na pačatku kampanii kolkaść aficyjna zarehistravanych vybarcaŭ składała 20 808 čałaviek. Pavodle vynikovych pratakołaŭ hetaja ličba skłała 23 228 čałaviek. Pakazalna, što pryrost» adbyŭsia za košt tych učastkaŭ, dzie ad sakavika minułaha hodu praktyčna nie adbyvałasia zasialeńnie novych damoŭ.
Jašče ŭ listapadzie minułaha hodu sp. Łahviniec źviartaŭ uvahu CVK, harvykankamu dy kiraŭnika administracyi Frunzenskaha rajonu na značna zanižanuju kolkaść vybarcaŭ u Frunzienskim rajonie i asabliva ŭ Sucharaŭskaj akruzie, adnak biezvynikova. Sp. Akopaŭ miarkuje, što manipulacyi ź niaŭličanymi vybarcami mahli šyroka praktykavacca padčas apošnich prezydenckich vybaraŭ. Pra heta ŭskosna śviedčać nastupnyja fakty: na niekatorych učastkach ahulnaja kolkaść aficyjna zarehistravanych vybarcaŭ całkam supadaje z kolkaściu hramadzianaŭ, što prahałasavali tut na apošnich prezydenckich vybarach.
Daterminova prahałasavała 45 % vybarcaŭ 27‑j akruhi (amal kožny druhi vybarca), na 1‑m učastku — 67 %.
Tak ličyli hałasy ŭ Sucharaŭskaj akruzie
Błytanina ź ličbami ŭ vynikovych pratakołach, zafiksavanaja naziralnikami na 9‑ci z 11‑ci ŭčastkaŭ. Pa vynikach tych ža pratakołaŭ u Sucharaŭskaj akruzie pryniali ŭdzieł 13166 čałaviek, a vykarystanych biuleteniaŭ naličyli 12 890 (što taksama adlustravana ŭ pratakołach). Takim čynam niaŭličanymi apynulisia 271 hołas vybarcaŭ dadzienaj akruhi.
Na 1‑m i 5‑m učastkach čalcy kamisii vusna pry śviedkach paviedamlali kolkaść aficyjna zarehistravanych vybarcaŭ. U pratakołach, padpisanych staršyniom i čalcami kamisii, hetyja ličby značna roźnilisia. Naprykład na 5‑m učastku «vusnaja»ličba skłała 2807 čałaviek, suprać 2270 «pratakolnych» vybarcaŭ.
Za Alesia Łahvinca pa aficyjnych dadzienych prahałasavali 654 čałavieki, pry tym, što za jaho sabrali 951 podpis.
Amal na kožnym učastku kolkaść atrymanych biuleteniaŭ była mienšaj za kolkaść zarehistravanych vybarcaŭ. Na dumku niezaležnych kandydataŭ, ułady ad pačatku prahnazavali nizkuju jaŭku hramadzianaŭ na vybary.
U miascovym druku amal nie aśviatlałasia tema novaj formy biuleteniaŭ, što, na dumku K. Akopava, spryčyniłasia da źjaŭleńnia vialikaj kolkaści niesapraŭdnych i sapsavanych biuleteniaŭ.
14 studzienia na svoj dzień narodzinaŭ Aleś Łahviniec atrymaŭ ad kalehi ŭ padarunak vybarčy biuleteń z «ptušačkaj» suprać svajho proźvišča. Ale na tym učastku ŭ vynikovym pratakole źniknieńnie dakumenta nie adznačyli, i kolkaść vydadzienych biuleteniaŭ supała z kolkaściu vyciahnutych sa skryni.
U časie hetych vybaraŭ A. Łahvincu była vyniesienaje papiaredžańnie za nibyta niapravilnuju apłatu vydatkaŭ na vyrab ahitacyjnych materyjałaŭ, chacia jon admaŭlaje jakija‑kolviek parušeńni sa svajho boku, bo razmova išła pra ŭlotki Ruchu «za Svabodu». Za heta jaho mahli źniać z vybaraŭ. Kali adkaznaść za raspasiud hetych ulotak uziaŭ na siabie Akopaŭ, to ź jaho zapatrabavali tłumačeńni, ale papiaredžańnie nia vynieśli.
Staršyni ŭsich učastkaŭ akruhi sa spasyłkaj na zakon admovilisia piśmova paviedamić pra kolkaść atrymanych biuleteniaŭ, ahulnuju kolkaść hramadzianaŭ, uniesienych u śpisy vybarcaŭ, a taksama ličby daterminovaha hałasavańnia. Na 2‑m vybarčym učastku paraili źviarnucca ŭ vyšejšyja instancyi, spasłaŭšysia na adsutnaść takich paŭnamoctvaŭ. Pry hetym niezaležny kandydat taksama kiravaŭsia zakonam — art. 34 Kanstytucyi, jaki harantuje prava na atrymańnie infarmacyi, art. 13 i 74 Vybarčaha kodeksu, jakija harantujuć hałosnaść pry padrychtoŭcy i praviadzieńni vybaraŭ i prava kandydataŭ u deputaty na atrymańnie nieabchodnaj infarmacyi.
Navat niaznačnaja prysutnaść niezaležnych naziralnikaŭ mocna nervuje ŭłady. Prykład nazirańnia ŭ 27‑j akruzie śviedčyć, što niedaremna. K. Akopaŭ kaža: «Mała prosta ŭdzielničać u vybarach, dy potym pakazalna źniacca». Pa jaho słovach, hałoŭnaj zadačaj niezaležnaha hramadztva faktalahična vyjaŭlać sutnaść ułady, jakaja najbolš jaskrava prajaŭlajecca ŭ časie vybaraŭ. A tamu treba praciahvać pracu da apošniaha.
A. Łahviniec skiravaŭ u Centarvybarkam skarhu, adnak tam jaho pieranakiravali ŭ terytaryjalnuju dy akruhovuju kamisii, jakija 15 studzienia nie pracavali. Pavodle zakonu na pryjom skarhi advodzicca nastupny pa vybarach dzień. Zaraz jon rychtuje adpaviedny zvarot u Prakuraturu.