Alaksandar Łukašenka: "Jość drovy — biarycie i palicie"
U Navapołacku prachodzić narada z udziełam prezydenta krainy.
«Biełaruś pavinna bolš efiektyŭna vykarystoŭvać svajo hieapalityčnaje stanovišča». Pra heta zajaviŭ siońnia prezident Biełarusi Alaksandr Łukašenka na naradzie ŭ Navapołacku pa pytańniach hatoŭnaści krainy da raboty ŭ novych cenavych umovach pastavak paliŭna‑enierhietyčnych resursaŭ. «Rasija maje unikalny resurs ‑ vuhlevadarody. Naš stratehičny resurs ‑ hieapalityčnaje stanovišča. My pavinny vykarystoŭvać jaho tak, jak Rasija vykarystoŭvaje svaje resursy», ‑ ličyć kiraŭnik dziaržavy. «Dla Biełarusi niama ničoha nievyrašalnaha. Treba zmahacca za ŭsio».
Taksama A. Łukašenka zaznačyŭ, što rezki skačok cen na rasijskija enierharesursy nie pavinien lehčy ciažaram na ludziej. «Situacyja, u jakuju trapiła Biełaruś u kancy minułaha ‑ pačatku biahučaha hoda, paŭtarycca nie pavinna».
Prezident Biełarusi daručyŭ raspracavać šerah mier pa ekanomii enierharesursaŭ u krainie. «U nas niepačaty kraj raboty ŭ hetym napramku. Času na razvarušvańnie niama».
U pryvatnaści, kiraŭnik dziaržavy ličyć nieabchodnym admovicca ad vykarystańnia vuhlevadarodnaj syraviny dla aciapleńnia małych vytvorčych pamiaškańniaŭ, naprykład sielskahaspadarčych fierm. «My datavać ich nie budziem. Jość drovy ‑ biarycie i palicie», ‑ skazaŭ Alaksandr Łukašenka.