Horki čas cukrovych kambinataŭ
Biełaruś doraha płacić za krucielskuju intehracyju z Rasiejaj.
Rasieja asensavana ciśnie na tyja biełaruskija pramysłovyja abjekty, što zdolnyja prynosić prybytak jak za košt unutranaha rynku, tak i za košt ekspartu. Prykładam hetamu – čarhovaja cukrovaja vajna.
Pry kancy hodu rasiejskaja mytnia značna zamarudziła ŭvoz biełaruskaha cukru, a z 29 śniežnia i naohuł jaho pierapyniła. Pryčynaŭ hetamu niekalki. Pieršaja – pretenzii rasiejskich vytvorcaŭ cukru nakont niaroŭnych umovaŭ dziejnaści: biełaruski cukar praź vialikija dziaržaŭnyja subsidyi na paradak tańniejšy za rasiejski. Druhaja – rasiejcy sumniavajucca, što ŭvieś biełaruski cukar, ekspartavany ŭ Rasieju, atrymany z cukrovikaŭ. Sprava ŭ tym, što cukar‑syrec, jaki vyrablajuć z ekspartavanaha z Paŭdniovaj Ameryki tryśniahu, musić abkładacca mytam. Pavodle rasiejskich ekspertaŭ biełarusy ŭžo kolki hod zavoziać u Rasieju burakovaha cukru ŭ 1,5 razy bolej, čym u Biełarusi jaho było vyrablena. Z metaju papiaredzić padman Rasieja stvaryła dla biełaruskich pastaŭščykoŭ adziny mytny kalidor, na jakim pilna sočać za jakaściu i pachodžańniem biełaruskaha cukru. Heta značna zamarudziła prapusknuju zdolnaść rasiejskaj mytni, a vydatki biełaruskaha boku tolki za prastoj aceńvajucca ŭ niekalki miljonaŭ dalaraŭ.
Premjer Siarhiej Sidorski zapeŭniŭ, što biełaruski cukar chutka iznoŭ źjavicca na rasiejskim rynku. Pra heta jon damoviŭsia padčas pieramovaŭ z rasiejskim kaleham Michaiłam Fradkovym. Pieramovy pa cukrovym pytańni adnoviacca na hetym tydni. Biełaruski bok pa‑raniejšamu budzie pradstaŭlać kiraŭnik kancernu «Biełdziaržcharčpram» Ivan Dančanka. Pa jaho słovach abjomy pastavak cukru ŭ Rasieju pakul nia vyznačanyja.
Biełaruskija cukrovyja zavody jašče ŭ savieckija časy byli siarod pieršych pa pradukcyjnaści pracy i jakaści praduktu. Ich patencyjał nie prajšoŭ pa‑za ŭvahaj ciapierašniaj ułady: štohadovyja ŭkładańni ŭ madernizacyju vytvorčaści składajuć dziasiatki miljonaŭ dalaraŭ. Heta dazvoliła pavialičyć vytvorčaść cukru z burakoŭ utraja i na siońnia jaho kolkaść składaje kala pałovy ad usiaho abjomu. Sioleta ŭ Biełarusi była vyrablena cukru kala 800 tys.t. Hetaha chopić dla ŭnutranaha rynku na bližejšyja 2,5 hady. Ciaham apošnich hadoŭ «lišak» cukru składaje 400‑450 tys.t., i tradycyjna bolšuju častku hetaj rešty ekspartavali ŭ Rasieju. Tak, u minułym hodzie było zaplanavana pastavić rasiejcam kala 370 tys.t. cukru. Na 2007 h. Biełaruskaja cukrovaja kampanija zaklučyła damovy z rasiejskimi kampanijami na pastaŭku 350 tys.t. cukru.
Na siońnia ŭ Biełarusi dziejničajuć čatyry cukrovyja kambinaty: u Haradziei, Žabincy, Skidzieli i Słucku. Pieršyja try ź ich źjaŭlajucca horadaŭtvaralnymi pradpryjemstvami i tamu ekanamičnyja prablemy na cukrovych kambinatach niepaźbiežna adabjucca na sacyjalna‑ekanamičnaj sytuacyi hetych pasieliščaŭ.
Da ŭsiaho sielskahaspadarčyja pradpryjemstvy, što zabiaśpiečvajuć syravinaj kambinaty, sutyknucca z rezkaj i adčuvalnaj źmienaj specyjalizacyi. Užo ciapier ahranomam tak zvanych «burakovych» haspadarak zahadvajuć značna źmianšać pasievy cukrovikaŭ.