Supierhieroj maŭklivych pratestaŭ

«Kaniečnie, baimsia stracić pracu. Ale ŭ nas małoje dzicia, chočacca, kab jano žyło ŭ svabodnaj krainie i biez strachu», kaža žonka Siarhieja Krukoŭskaha i prosić ab dapamozie.

Siarhiej Krukoŭski (tady jašče nie viedali jaho imia i proźvišča) staŭ hierojem fotarepartažu Jeŭraradyjo z adnoj z červieńskich maŭklivych akcyj (fota było vielmi papularnym u sacyjalnych sietkach). Tady jon zastaŭsia na voli, a ŭ sieradu, 13-ha, patrapiŭ za kraty. Ludzi ŭ cyvilnym schapili jaho na staličnaj płoščy Jakuba Kołasa. Siarhiej byŭ asudžany na 8 sutak aryštu.

Siarhiej siadzić na sutkach, zatoje ŭdałosia pahutaryć ź jahonaj žonkaj Alenaj.

Raskažycie, što nasamreč u Siarhieja «betmanaŭskaha» jość, bo jon vyhladaje jak sapraŭdny kinahieroj, kali jaho niasuć u aŭtobus?

«Nasamreč jon nijakaja nie zorka — ścipły chłopiec, nikoli ničym nie kičyŭsia. Prosta jon taki pazityŭny čałaviek u žyćci i nie markocicca navat u samych składanych situacyjach».

Ci na ŭsie akcyi chodzić Siarhiej?

Alena: «Nie, jon chadziŭ nie na ŭsie akcyi. My chadzili na niejkuju ź pieršych akcyjaŭ, kali źjavilisia hetyja fatazdymki, ale sprava ŭ tym, što ŭ jaho dastatkova składanaja praca i jon uvieś čas zahružany».

Kali nie sakret, jakaja praca, čym zajmajecca vaš muž?

Alena: «Jon pracuje u budaŭničaj arhanizacyi majstram, na budoŭli pracuje».

A jak da hetaha staviacca kalehi pa pracy? Ci jość niejkaja salidarnaść ź Siarhiejem?

Alena: «Ja chadziła na adnu z akcyjaŭ. I chadzili niejkija jaho siabry. Ja viedaju, što na pracy jaho ludzi padtrymoŭvajuć, ale nie dumaju, što tam niechta vychodziŭ na vulicy. Bo, vy ž razumiejecie, u ludziej strach, strach zhubić pracu, a tyja, chto mohuć pierakročyć praz svoj strach, tyja vychodziać na vulicu».

Siarhiej nie baicca stracić pracu?

Alena:. «Dumaju, što baicca.

Ale situacyja, jakaja skłałasia ŭ nas u krainie, tak prycisnuła, što niama siłaŭ ciarpieć heta ŭsio i strach adstupiŭ na niejkaje druhoje miesca.

Viedajem, što Siarhiej siadzić «na sutkach». Kolki jamu dali?

Alena: «Jaho aryštavali na 8 sutak. Sud byŭ poŭnym absurdam. My vybivali advakata, my chadajničali, kab vyklikali dvuch śviedkaŭ, jakija śviedčać, što jon tam „niecenzurna łajaŭsia, machaŭ rukami i pieraškadžaŭ hramadskamu paradku“. Nie viedaju, ci my vyklikali jašče bolšy hnieŭ sudździ,

ale heta prahučała, jak ździek, kali jana skazała, što ŭličvajučy, što ŭ nas maleńkaje dzicia i heta źmiakčalnaja abstavina — i majmu mužu dajuć 8 sutak.

Mnie zaraz samaje hałoŭnaje — znajści choć niekalkich śviedkaŭ, jakija tady byli na płoščy i mohuć paćvierdzić, što moj muž u momant zatrymańnia razmaŭlaŭ pa telefonie i nikoha nie čapaŭ. Jašče ŭčora my padali skarhu ŭ haradski sud. U paniadziełak budzie razhlad hetaj spravy i kali buduć pakazańni śviedkaŭ, to ja spadziajusia, što my niešta zmožam zrabić».

* * *

Alena Krukoŭskaja šukaje śviedak zdareńnia, kab u sudzie abskardzić prysud. Baćku 9-miesiačnaha dziciaci asudzili na 8 sutak administracyjnaha aryštu nibyta za łajanku.

Telefon: + 375 44 714 54 13

Kamientary da artykuła