Hienprakuror nahadaŭ ministru unutranych spraŭ ab pravach žurnalistaŭ
Hienieralny prakuror Biełarusi Ryhor Vasilevič nakiravaŭ ministru ŭnutranych spraŭ Anatolu Kulašovu list u suviazi z zajavaj žurnalistaŭ, što pastupiła ŭ Hienprakuraturu 13 lipienia, ab nieabhruntavanych zatrymańniach pradstaŭnikoŭ ŚMI pry praviadzieńni niesankcyjanavanych masavych mierapryjemstvaŭ, kanfiskacyi ŭ ich fotavideamateryjałaŭ i prafiesijnaj techniki.
Jak paviedamili ŭ Hienprakuratury,
u liście ŭkazana, što pravy i abaviazki žurnalistaŭ vyznačany zakonam «Ab srodkach masavaj infarmacyi», zhodna ź jakim žurnalist maje prava ŭ paradku, vyznačanym zakanadaŭstvam, prysutničać pa zadańni redakcyi na masavych mierapryjemstvach i pieradavać adtul infarmacyju.
Pry hetym, jak zaznačajuć u Hienprakuratury, «žurnalist abaviazany vykonvać patrabavańni zakanadaŭstva, pavažać pravy, svabody i zakonnyja intaresy fizičnych i jurydyčnych asob, pradjaŭlać pa patrabavańni pry ažyćciaŭleńni prafiesijnaj dziejnaści słužbovaje paśviedčańnie. Zamiežnyja žurnalisty mohuć ažyćciaŭlać dziejnaść tolki pry najaŭnaści akredytacyi ŭ Respublicy Biełaruś».
Supracoŭniki orhanaŭ unutranych spraŭ u adpaviednaści z art. 25 zakona «Ab orhanach unutranych spraŭ Respubliki Biełaruś» nadzieleny paŭnamoctvami pa časovym abmiežavańni abo zabaronie dostupu hramadzian na asobnyja ŭčastki miascovaści i abjekty, a taksama majuć prava abaviazać pakinuć vyznačanyja miescy dla zabieśpiačeńnia asabistaj i hramadskaj biaśpieki. Zhadanyja paŭnamoctvy mohuć być realizavany i ŭ dačynieńni da pradstaŭnikoŭ ŚMI, zaznačyli ŭ Hienprakuratury.
Pry hetym u Hienprakuratury miarkujuć nieabchodnym uličvać, što «dziejnaść žurnalistaŭ pry zbory i pieradačy infarmacyi nosić prafiesijny charaktar i zasnavana na normach zakanadaŭstva».
Hienieralny prakuror vykazaŭsia za zabieśpiačeńnie vykanańnia zakanadaŭstva takim čynam, kab «i supracoŭniki pravaachoŭnych orhanaŭ, i žurnalisty mahli vykonvać uskładzienyja na ich abaviazki i realizoŭvać svaje pravy, zamacavanyja ŭ zhadanych zakonach».
Pa faktach pryciahnieńnia žurnalistaŭ da administracyjnaj adkaznaści daručana pravieści pravierku, paviedamili ŭ Hienprakuratury.