Pačobut padaŭ kasacyjnuju skarhu ŭ Hrodzienski abłasny sud
Žurnalist polskaj «Haziety vyborčaj» Andrej Pačobut 13 lipienia padaŭ kasacyjnuju skarhu ŭ Hrodzienski abłasny sud na prysud suda Leninskaha rajona Hrodna ad 5 lipienia.
Zhodna z pryhavoram rajonnaha suda, Pačobut byŭ apraŭdany pa častcy 1 artykuła 368 Kryminalnaha kodeksa (abraza prezidenta Biełarusi), ale byŭ pryznany vinavatym pa častcy 1 artykuła 367 KK (paklop u dačynieńni da prezidenta). Jon pryhavorany da troch hadoŭ pazbaŭleńnia voli z adterminoŭkaj vykanańnia prysudu na dva hady.
Jak paviedamiŭ Pačobut BiełaPAN, kasacyjnaja skarha padavałasia dla taho, «kab nie prapuścić termin». Chutkim časam žurnalist źbirajecca aznajomicca z pratakołam pa svajoj spravie i paŭtorna padać skarhu, ale ŭžo ŭ pašyranym, udakładnienym varyjancie.
Pačobut skazaŭ, što z momantu jak jon znachodzicca na voli, nijakich represiŭnych dziejańniaŭ u dačynieńni da jaho «supracoŭniki orhanaŭ nie pradprymajuć».
«Pakul ja baŭlu čas ź siamjoj,sustrakajusia ź siabrami z Sajuza palakaŭ, zrazumieła, žurnalisty ŭvieś čas intervju zapisvajuć — voś tak maje dni vyhladajuć», — patłumačyŭ jon.
Na nastupny dzień paśla abviaščeńnia prysudu Pačobut naziraŭ za maŭklivaj akcyjaj pratestu ŭ centry Hrodna.
«Mnie było cikava pabačyć, jak heta [akcyja] vyhladaje, — adznačyŭ žurnalist. — U sieradu ja ŭžo naziraŭ toj chapun, jaki byŭ u centry Hrodna. Mahu skazać, što stupień paranoi ŭ asiarodździ ŭłady značna pavialičyłasia. Ja bačyŭ, jak razhonam akcyi asabista kiravaŭ načalnik Hrodzienskaha ŭpraŭleńnia ŭnutranych spraŭ. Niekatorych ludziej u cyvilnym ja paznaŭ — heta byli hrodzienskija milicyjaniery».