Biełaruski HKČP i «Lebiadzinaje voziera» dla Łukašenki

Raźvićcio padziejaŭ u Biełarusi ŭ nastupnyja miesiacy nie paddajecca prahnazavańniu. Piša ŭ svaim błohu Aleś Čajčyc.

U suviazi z paharšeńniem ekanamičnaj situacyi ŭ Biełarusi toj-sioj vykazvaje piesimizm: na fonie nieabchodnaści pryniaćcia radykalnych rašeńniaŭ biełarusam nie chopić, bač ty, pasijanarnaści, i usie pracazdolnyja źjeduć na zarobki ŭ Rasiju ź jaje nibyta biazdonnym pracoŭnym rynkam.

Lišnie kazać, kamu vyhadnyja takija razvahi i kamu patrebnaje zamacavańnie dumki pra mlavaść i kvołaść biełarusaŭ. Žyćcio, na žal dla ich, rasstavić usio pa svaich miescach vielmi imkliva.

Padziei 1991 hoda, dvaccacihadovaj daŭniny, demanstrujuć, što

a) ekanamičnyja prablemy zdolnyja vyvieści i biełarusaŭ na płošču;

b) pad upłyvam ludziej, što vyjšli na płošču, biełaruskija ŭłady taksama schiłnyja da rezkaha parazumnieńnia.

«U krasaviku 1991 hodu niekalki dziesiatkaŭ tysiač rabočych mienskich pradpryjemstvaŭ raspačali strajk i vyjšli na płošču pierad Domam uradu. Pieršapačatkovaj pryčynaj było padvyšeńnie cenaŭ», piša Siarhiej Navumčyk, były deputat Viarchoŭnaha savieta BSSR ad Biełaruskaha narodnaha frontu, u svajoj knizie «Siem hadoŭ Adradžeńnia», jakaja źjaŭlajecca vydatnym pomnikam toj losavyznačalnaj dla Biełarusi eposie.

«Užo ŭ pieršy dzień aktyvistam BNF udałosia prapanavać strajkamaŭcam palityčnyja lozunhi, u tym liku i patrabavańnie ab novych vybarach u Viarchoŭny Saviet», — praciahvaje jon.

Pad ciskam mienavita ekanamičnych prablemaŭ biełarusy vyjšli na płošču dvaccać hod tamu. Mienavita dziasiatki tysiač ludziej na płoščy prymusili Viarchoŭny Saviet BSSR (u składzie jakoha tady byŭ i mała kamu viadomy ekscentryčny deputat Łukašenka) pad ciskam Biełaruskha narodnaha fronta nadać kanstytucyjny status Dekłaracyi ab niezaležnaści Biełarusi 1990 h., a taksama pryniać pieršyja klučavyja zakony niezaležnaj Biełarusi.

Prajšło dvaccać hadoŭ. Raźvićcio padziejaŭ u Biełarusi ŭ nastupnyja miesiacy, što lažać pierad nami, nie paddajecca prahnazavańniu: pieramiennych zašmat. Ci aznačaje devalvacyja biełaruskaha rubla ŭžo na tracinu, na jakim skaračeńnie zarobkaŭ biełarusaŭ nijak nie skončycca, pačatkam doŭhačakanaha dla mnohich z nas kanca siamnaccacihadovaj nacyjanalnaj hańby? Nikomu nie viadoma.

Zrazumieła tolki, što biełaruski režym nie vybieracca z hetaj pastki ŭłasnymi siłami.

Dapamohu z Zachada jon atrymaje tolki ŭzamien na demakratyzacyju. Dapamohu z uschoda jon atrymaje tolki ŭzamien na prodaž rasiejcam najbolš kaštoŭnych pradpryjemstvaŭ i arhumientavanaje pierakanańnie Maskvy ŭ svajoj łajalnaści.

Nie atrymaŭšy pry hetym harantyi, što za ŭsim hetym adnoj ranicaj nie paśleduje «Lebiadzinaje voziera» pa ŭsich biełaruskich telekanałach z nastupnaj pres-kanfierencyjaj niejkaha biełaruskaha HKČP z łajalnych Maskvie biełaruskich siłavikoŭ, jakoje paviedamić nam pra niazdolnaść Alaksandra Łukašenki da dalejšaha kiraŭnictva krainaj «pa stanie zdaroŭja» — što na toj momant, mabyć, budzie navat užo i praŭdaj.

Abmieńvać suvierenitet na lišnija paru miesiacaŭ iluzii ŭłady režym nie budzie.

Dyj

prahmatyčnym biznesoŭcam na čale Rasiei toj skasavany biełaruski suvierenitet nie tak i patrebien,

Maksimum, što patrebna Rasii — heta "Biełaruśkalij", MTS, naftapierapracoŭka i Mytny źviaz. Samy maksimum — uviadzieńnie rasijskaha rubla.

A praź jaki hod usio roŭna adnojčy ranicaj ździvić biełaruskaha telehledača «Lebiadzinym vozieram» pa ŭsich kanałach BT.

Što moža biełaruskaja demakratyčnaja apazicyja u hetych umovach? Rychtavacca pracavać u strajkamach (zabytaje słoŭca?) i rychtavać što skazać niekalkim dziasiatkam tysiač rabočych na Płoščy Niezaležnaści. Budzie cikava.

Kamientary da artykuła