Vinšavańnie palitviaźniaŭ zaviaršyłasia zatrymańniem Dźmitryjeva

Aktyvisty kampanii «Havary praŭdu» adpravili im siońnia niekalki socień paštovak i listoŭ.

Aktyvisty kampanii «Havary praŭdu» adpravili niekalki socień paštovak ź vinšavańniami z Dniom Voli aktyvistam apazicyi, jakija znachodziacca ŭ śledčych izalatarach KDB i MUS.

Tort i kvietki dla Niaklajeva, jaki pad chatnim aryštam

I dla Iryny Chalip. Na fota jaje mama - Lucyna.

Maryna Fiaduta

Kaperty ź vinšavańniami ŭsim viaźniam

Baćka Nasty Pałažanki i žonka Alaksandra Fiaduty.

Pavinšavać paplečnikaŭ pryjšła i Maja Abromčyk, jakoj 19 śniežnia milicyjanty złamali nahu.

Zranku 25 sakavika aktyvisty kampanii «Havary praŭdu!» praviali akcyju «Padtrymaj źniavolenych», prymierkavanuju da Dnia Voli. Pavodle Andreja Dźmitryjeva, byłoha kiraŭnika vybarčaha štaba kandydata ŭ prezidenty Uładzimira Niaklajeva, jany spadziajucca, što ŭsie paštoŭki trapiać i da tych, chto znachodzicca za kratami, i da tych, kaho źmiaścili pad chatni aryšt.

«U hetych paštoŭkach niama ničoha takoha, što mahło b pieraškodzić śledstvu — heta prosta słovy padtrymki. Ja dumaju, što jość šaniec, što ich prapuściać. Heta prosta paštoŭki, dzie napisana, što my padtrymlivajem vas, žadajem vam pośpiechaŭ, žadajem vam siły —

Za dva dni sabrali bolš za 1 tysiaču listoŭ i paštovak sa słovami padtrymki. Častku ludzi z rehijonaŭ dasłali sami, a častku dasłali ŭ Minsk, kab ich naŭprost pieradali svajakam palitviaźniaŭ.

Da Hałoŭpaštamta padyšła žonka Alaksandra Fiaduty Maryja. Zhodna ź jaje słovami, dla čałavieka, jaki znachodzicca ŭ SIZA KDB, hetyja paštoŭki nie prosta viestki z voli: «Heta padtrymka nieabyjakavych ludziej, słovy salidarnaści i, musić, niejkija nadziei na niešta śvietłaje. Budziem dumać mienavita tak!»

Z tym, što hetyja słovy salidarnaści i padtrymki vielmi važnyja, pahadžajecca i Volha Niaklajeva: «Va Ŭładzimira pavyšany cisk z-za taho, što jon nikudy nie vychodzić z chaty voś užo dva miesiacy. Hałava pastajanna balić. A jašče pačalisia prablemy sa śpinaj. Maleńkaja kvatera, nieruchomaść — ciažka. Ale voś u Dzień Voli pieradali listy vinšavalnyja. Heta vinšavańni sa śviatam, žadajuć ludzi zdaroŭja i mužnaści. I ja liču, što ŭ hetym hodzie hetaje śviata — heta śviata salidarnaści z palitźniavolenymi».

A Uładzimir Pałažanka vykazvaje ŭpeŭnienaść u tym, što hetyja listy dadaduć źniavolenym viery:

«Kali b i toj ža Statkievič, i toj ža Niaklajeŭ, i toj ža Fiaduta, i inšyja, chto siońnia znachodziacca za kratami albo pad chatnim aryštam, mieli mahčymaść bačyć tych ludziej, jakija prychodziać, dasyłajuć paštoŭki, ich viera ŭ narod umacavałasia b i maralnych siłaŭ dadałosia b».

Darečy, pierad tym, jak pryjści da paštamta, aktyvisty «Havary praŭdu» paśpieli naviedać Uładzimira Niaklajeva i Irynu Chalip. Pabačyć ich, zrazumieła, nie dazvolili supracoŭniki KDB, što sutkami znachodziacca ŭ kvatery eks-kandydata i žurnalistki, ale im pieradali kvietki i torty. Na tortach kremam namalavanaja litara «V» — victoria (pieramoha).

Paśla adpraŭki paštovak Andrej Dźmitryjeŭ nakiravaŭsia ŭ pryjomnuju KDB, dzie ŭ hety čas znachodzilisia Volha Bandarenka i Darja Korsak, žonki Źmitra Bandarenki i Alaksandra Atroščankava. Pieradaŭ im kvietki i paštoŭki. Pa vyjści z KDB 8 supracoŭnikaŭ u cyvilnym «prapanavali» Andreju Dźmitryjevu sieści da ich u mikraaŭtobus. Dzie zaraz znachodzicca aktyvist — nieviadoma.

Kamientary da artykuła