U Kalininhradzie dziejničaje ŭnijacki prychod Jeŭfrasińni Połackaj

U biełarusaŭ Kalininhrada źjaviłasia mahčymaść naviedvać biełaruskija unijackija bohasłužby. U 2010 hodzie tam byŭ stvorany prychod Jeŭfrasińni Połackaj. Pra heta paviedamiŭ siabra Kalininhradskaha rehijanalnaha hramadskaha abjadnańnia «Biełaruskaje tavarystva kultury» Raścisłaŭ Šachovič. Dakładnaj daty stvareńnia prychodu niama. Pačałosia ŭsio z taho, što ŭnijacki śviatar z Sankt-Pieciarburha staŭ pryjazdać ŭ Kalininhrad, kab pravodzić imšy.

«My daviedalisia pra heta ad adnaho ź siabraŭ Biełaruskaha tavarystva kultury. I my pačali źbiracca, unijaty abo vierujučyja biełarusy, kab razam malicca. I paśla źjaviłasia dumka stvaryć prychod, bo šmat biełarusaŭ, jakija b chacieli chadzić va ŭnijacki prychod, a jaho niama, i jany chadzili ŭ katalicki kaścioł. Tak na pačatku studzienia źjaviŭsia prychod», — raspavioŭ Raścisłaŭ Šachovič.

Pakul prychod nie maje svajho budynka i słužby pravodziacca kožnyja druhija vychodnyja ŭ budynku Katalickaha prychoda Śviatoha Siamiejstva (Kalininhrad, vuł. Lesapilnaja, 72). Padčas apošnich bohasłužbaŭ biełarusy malilisia za palitviaźniaŭ i paciarpiełych u vyniku padziej 19 śniežnia ŭ Minsku.

Słužby pravodzić ajciec Kirył, jon rasiejec pa pachodžańniu, ale vielmi dobra viedaje ŭkrainskuju i biełaruskuju movy.

«Kali prychodziać tolki biełarusy, to ajciec Kirył pravodzić słužbu tolki pa-biełarusku, kali prychodziać i ukraincy, to jon pravodzić słužbu pa-biełarusku i pa-ukrainsku, kali jość rasiejcy, to jon sprabuje zrabić słužbu na troch movach, — havoryć Raścisłaŭ Šachovič. — Asnoŭnyja malitvy pravodziacca na tych movach, na jakich havorać vierniki, jakija pryjšli. Biełarusaŭ prychodzić dosyć šmat. Da prykładu na pieršych imšach było 13–14 čałaviek, ale ź ich było 10 biełarusaŭ. Ciapier prychodzić bolš ludziej. My płanujem dać infarmacyju pra prychod u ŚMI, raźviesić abviestki ŭ kaściołach, pratestanckich i pravasłaŭnych cerkvach u Kalininhradzie».

Nakont pierśpiektyvaŭ nabyć svoj budynak dla prychodu ŭ Kalininhradzie, ajciec Kirył havoryć, što kali buduć prychodzić ludzi, to Pieciarburhskaja parafija, da jakoj naležyć Kalininhrad, daść hrošy, kab možna było zbudavać svoj budynak, svaju carkvu, paviedamiŭ Raścisłaŭ Šachovič.

«Heta značyć — usio zaležyć ad nas, ad ludziej, jakija buduć tudy prychodzić i buduć raźvivać heta ŭ Kalininhradzie», — havoryć Raścisłaŭ.

ližejšyja bohasłužby projduć 19 i 26 sakavika. Apošniaja sustreča budzie prymierkavana da adznačeńnia Dnia Voli. Adbudziecca malitva za ŭsich biełarusaŭ.

Dakładny čas, kali buduć pravodzicca bohasłužby, možna daviedacca ŭ Biełaruskim tavarystvie kultury.

Ihar Šachovič, staršynia Biełaruskaha tavarystva kultury: teł.: 906217591, siakera @ mail.ru

Kamientary da artykuła