Minskich advakataŭ nie zapałochali. Pylčanka: «U Biełarusi skłałasia krytyčnaja situacyja»

Pryniata rašeńnie pravieści niečarhovy ekstrany schod Minskaj haradskoj kalehii advakataŭ.

U Biełarusi skłałasia krytyčnaja situacyja, jakaja realna pahražaje niezaležnaści advakatury, miarkujuć u Minskaj haradskoj kalehii advakataŭ.

Jak paviedamiŭ staršynia Minskaj haradskoj kalehii advakataŭ Alaksandr Pylčanka, 17 lutaha na pašyranym pasiadžeńni prezidyuma kalehii, jakoje prachodziła z udziełam kiraŭnikoŭ jurydyčnych kansultacyj, abmiarkoŭvałasia pytańnie ab pazbaŭleńni čatyroch advakataŭ licenzij.

Jak paviedamlałasia raniej, 14 lutaha Ministerstva justycyi pryniało pastanovu ab pazbaŭleńni licenzii čatyroch advakataŭ Minskaj haradskoj kalehii, jakija abaraniali ŭdzielnikaŭ akcyi 19 śniežnia, — Aleha Ahiejeva, Taćciany Ahiejevaj, Uładzimira Tołścika i Tamary Harajevaj.

Dziejańnie licenzij, vydadzienych Alehu Ahiejevu (advakat eks-kandydata ŭ prezidenty Alaksieja Michaleviča) i Taćcianie Ahiejevaj, spyniena «za hrubyja parušeńni paradku afarmleńnia pahadnieńniaŭ na akazańnie jurydyčnaj dapamohi, čynieńnie pieraškod orhanu licenzavańnia ŭ praviadzieńni mierapryjemstvaŭ pa kantroli za vykanańniem zakanadaŭstva, jakoje prajaviłasia ŭ padavańni niepraŭdzivych źviestak». Uładzimir Tołścik i Tamara Harajeva pazbaŭleny licenzij «za hrubyja parušeńni zakanadaŭstva ab licenzavańni, jakija prajavilisia ŭ admovie akazańnia jurydyčnaj dapamohi Irynie Chalip».

Prezidyumu Minskaj haradskoj kalehii advakataŭ daručana pryniać «nieadkładnyja miery pa zabieśpiačeńni jurydyčnaj dapamohaj asob, abaroncami abo pradstaŭnikami jakich źjaŭlalisia zhadanyja advakaty».

Miž tym, jak paviedamiŭ Alaksandr Pylčanka, u dačynieńni da čatyroch nazvanych advakataŭ nijakich pradstaŭleńniaŭ adnosna ich prafiesijnaj dziejnaści ŭ kalehiju nie ŭnosiłasia. Adpaviedna, nijakich dyscyplinarnych vytvorčaściaŭ u dačynieńni da ich nie raspačynałasia.

Pylčanka taksama paviedamiŭ, što na pašyranym pasiadžeńni Minskaj haradskoj kalehii advakataŭ abmiarkoŭvałasia inicyjatyva Miniusta pa pryniaćci praviłaŭ prafiesijnaj etyki advakataŭ. Takija praviły, padkreśliŭ staršynia kalehii, «pavinny prymacca vyklučna advakackaj supolnaściu».

«Uvieś kirujučy skład Minskaj haradskoj kalehii advakataŭ ličyć najaŭnuju situacyju krytyčnaj, jakaja realna pahražaje niezaležnaści advakatury jak pravavoha instytuta, hetak i niezaležnaści advakataŭ paasobku», — zajaviŭ Pylčanka.

U suviazi z hetym pryniata rašeńnie pravieści niečarhovy ekstrany schod Minskaj haradskoj kalehii advakataŭ z zaprašeńniem usich zacikaŭlenych asob, skazaŭ Pylčanka.

Nahadajem, u kancy śniežnia Miniust ubačyŭ «hrubyja parušeńni praviłaŭ prafiesijnaj etyki» ŭ dziejańniach niekatorych advakataŭ, jakija abaraniajuć udzielnikaŭ akcyi 19 śniežnia. Kiraŭnictvu Minskaj haradskoj kalehii advakataŭ było zroblena pradstaŭleńnie z patrabavańniem pryniać «nieadkładnyja miery da biezumoŭnaha vykanańnia advakatami Praviłaŭ prafiesijnaj etyki i zakanadaŭstva». Adnak prezidyum kalehii nie ŭbačyŭ padstaŭ dla prymianieńnia jakich-niebudź sankcyj u dačynieńni da advakataŭ.

Miniust taksama paviedamiŭ ab padrychtoŭcy novaj redakcyi praviłaŭ prafiesijnaj etyki advakata ŭ metach «udaskanalvańnia dziejnaści advakataŭ pa akazańni jurydyčnaj dapamohi i zabieśpiačeńni abarony pravoŭ i zakonnych intaresaŭ hramadzian».

Aprača taho, u Biełarusi buduć uviedzieny novyja patrabavańni da kandydataŭ na atrymańnie licenzii na prava ažyćciaŭleńnia advakackaj dziejnaści. Pavodle źviestak Miniusta, płanujecca, u pryvatnaści, ustanavić dvuchuzroŭnievy ekzamien (piśmovy i vusny). Asablivyja patrabavańni Miniust maje namier vystaŭlać da asob, jakija raniej pracavali ŭ sudach, orhanach prakuratury, unutranych spraŭ, inšych pravaachoŭnych orhanach. U dačynieńni da takich asob kvalifikacyjnaj kamisijaj pierad praviadzieńniem kvalifikacyjnaha ekzamienu buduć zapytvacca rekamiendacyi i charaktarystyki z apošniaha miesca pracy.

1 lutaha Saviet kalehij advakataŭ Jeŭropy zaklikaŭ ministra justycyi Biełarusi Viktara Hałavanava «harantavać pryncypy niezaležnaści prafiesijnych asacyjacyj advakataŭ i niepraduziataści dyscyplinarnych razboraŭ».

Kamientary da artykuła