U Minsku prachodzić sumiesnaje pasiadžeńnie kalehij MZS Biełarusi i Rasii
U biełaruskim MZS pačałosia sumiesnaje pasiadžeńnie kalehij ministerstvaŭ zamiežnych spraŭ Biełarusi i Rasii. Dla ŭdziełu ŭ im napiaredadni viečaram u Minsk prybyŭ ministr zamiežnych spraŭ RF Siarhiej Łaŭroŭ.
Adkryvajučy pasiadžeńnie, kiraŭnik biełaruskaha źniešniepalityčnaha viedamstva Siarhiej Martynaŭ adznačyŭ: hałoŭnaje pytańnie paradku dnia — analiz chodu vykanańnia sumiesnaj dvuchhadovaj prahramy ŭzhodnienych dziejańniaŭ u śfiery źniešniaj palityki.
Martynaŭ padkreśliŭ, što ŭsie pytańni siońniašniaha pasiadžeńnia «vielmi aktualnyja» dla abodvuch bakoŭ.
«Abodva MZS pracujuć nie tolki nad dvuchbakovymi adnosinami, ale i nad tymi vyklikami, jakija źviazany z nastupstvam suśvietnaha ekanamičnaha kryzisu, madernizacyjami našych ekanomik. Najaŭnaść hetych vyklikaŭ tolki sadziejničaje paśpiachovaj aktyvizacyi našaha ŭzajemadziejańnia», — ličyć ministr.
Jon, u pryvatnaści, vykazaŭ padziaku rasijskim kaleham za padtrymku ŭ AAN inicyjatyvy Biełarusi pa baraćbie z handlem ludźmi.
Akramia taho, zajaviŭ Martynaŭ, Biełaruś zacikaŭlena ŭ tym, kab Rasija ŭdzielničała ŭ rehijanalnych prajektach u miežach Uschodniaha partniorstva.
«Važna papracavać i nad tym, kab Jeŭrasajuz i Mytny sajuz nie išli pa razychodnych trajektoryjach, a ŭ niejki momant pačali ŭzajemadziejničać na ekanamičnaj płatformie», — skazaŭ kiraŭnik biełaruskaha MZS.
Jaho rasijski kaleha Siarhiej Łaŭroŭ, u svaju čarhu, adznačyŭ: i Rasija, i Biełaruś «adkrytyja dla adnosin z usimi krainami na asnovie ŭzajemnaj pavahi i ŭzajemavyhadnaści».
Pavodle słoŭ Łaŭrova, na siońniašnim pasiadžeńni kalehij budzie abmierkavany kompleks pytańniaŭ, źviazanych ź dziejnaściu intehracyjnych struktur na prastory SND.
«Na Saviecie kiraŭnikoŭ dziaržaŭ SND, jaki adbudziecca ŭ nastupnym miesiacy ŭ Maskvie, buduć padviedzieny vyniki staršynstva tam Rasii. Jość pra što pahavaryć i ŭ śviatle pieradačy staršynstva Biełarusi ŭ ADKB», — skazaŭ Łaŭroŭ.
Asobnaja ŭvaha, adznačyŭ jon, budzie nadadziena pytańniu supracoŭnictva ź Jeŭrasajuzam.
«My z pavahaj stavimsia da tych intaresaŭ, jaki Jeŭrasajuz maje na prastory SND, — zajaviŭ Łaŭroŭ. — My padtrymlivajem raźvićcio adnosin pamiž Biełaruśsiu i inšymi jeŭrapiejskimi arhanizacyjami, uklučajučy Saviet Jeŭropy».
Kiraŭnik rasijskaha MZS, u pryvatnaści, nahadaŭ, što Rasija sadziejničała ŭklučeńniu Biełarusi ŭ jakaści naziralnika ŭ prahramu ES «Paŭnočnaje vymiareńnie».
Jak paviedamlałasia raniej, 2 listapada na ministerskaj sustrečy ŭdzielnikaŭ hetaha prajekta ŭ Osła Łaŭroŭ zajaviŭ: Rasija raźličvaje na pryniaćcie rašeńnia ab nadańni Biełarusi statusa naziralnika ŭ miežach «Paŭnočnaha vymiareńnia» (udzielnikami hetaj prahramy transhraničnaha supracoŭnictva źjaŭlajucca Hiermanija, Danija, Isłandyja, Łatvija, Litva, Narviehija, Polšča, Finlandyja, Šviecyja, Estonija i Rasija).