U Minsk prylataje Karalin Vaźniacki
Zaŭtra viečaram u Nacyjanalny aeraport “Minsk-2” rejsam z Amsterdama prylataje pieršaja rakietka śvietu — dackaja tenisistka Karalin Vaźniacki.
Na 19 listapada ŭ biełaruskaj stalicy zapłanavany dabračynny matč pamiž Vaźniacki i dziasiataj rakietkaj śvietu, biełaruskaj Viktoryjaj Azaranka.
Ideja praviadzieńnia hetaha matča naležyć samaj viadomaj biełaruskaj tenisistcy. Mienavita Azaranka prapanavała Vaźniacki naviedać Minsk i pravieści dabračynnuju sustreču ŭ metach papularyzacyi tenisa ŭ Biełarusi. Vaźniacki dała zhodu. Havorać, što nie apošnim faktaram dla hetaha stała daŭniaje i mocnaje siabroŭstva Viktoryi i Karalin.
Karalin Vaźniacki naradziłasia 11 lipienia 1990 hoda ŭ siamji palakaŭ Hanny i Piatra Vaźniacki na radzimie Hansa Chryścijana Andersana ŭ horadzie Adensie. Jaje baćki pierajechali ŭ Daniju jašče da naradžeńnia Karalin. Baćka Karalin Vaźniacki zaraz źjaŭlajecca jaje asabistym trenieram, a raniej byŭ prafiesijnym futbalistam. Maci Karalin Hanna ŭ svoj čas hulała ŭ valejboł na prafiesijnym uzroŭni. Zajmajecca sportam i starejšy brat tenisistki Patryk — jon vystupaje za dackuju futbolnuju kamandu “Frem”.
Što da samoj Karalin, to za svaju karjeru jana vyjhrała 12 turniraŭ WTA ŭ adzinočnym razradzie i 2 turniry – u parnym.
U 2006 hodzie Karalin Vaźniacki vyjhrała adzin z samych prestyžnych tenisnych turniraŭ — Uimbłdon. U 2009 hodzie datčanka była finalistkaj adkrytaha čempijanatu ZŠA. U biahučym hodzie Vaźniacki — pieršaja rakietka śvietu.
Matč pamiž Viktoryjaj Azaranka i Karalin Vaźniacki projdzie ŭ staličnym Pałacy sportu. Papiaredničać hulni buduć aŭtohraf-siesija tenisistak, majstar-kłas dla junych spartsmienaŭ. Zavieršycca mierapryjemstva dabračynnym aŭkcyjonam.Usie atrymanyja srodki buduć pieradadzieny ŭ Respublikanski navukova-praktyčny centr dziciačaj ankałohii i hiematałohii, što ŭ Baraŭlanach.Košt kvitkoŭ – 20.000, 50.000 biełaruskich rubloŭ.